Ilinniartitsisup soraartussanngornera ilinniartut naammagittaaliuutigaat

Ilinniartitsisup taassuma suliinnarsinnaanissaa Ilisimatusarfiup ilungersuutigisimanngikkaa isumaqarput, suliunnaarneratigullu atuartitsinerup ajorseriarnissaa, siornatigutullu atuartitsinerup pitsaannginnerulernissaa ernummatigalugu. Ilinniartut ilaat Hanne Rasmussen ilaatigut ima oqarpoq.

- Pia-mmi arlaleriarluni apeqqutigisarpaa, arraa taanna suli ilikkanngilisiuk, arraa aamma taanna alla suli ilikkanngilisiuk? Ila taama pisoqarneq ajorpoq.

Ilaatigooriarluni sianiikujuttutut misiginartarpoq, ilikkagassammi taama amerlatigisut suli ilikkarsimaneq ajoratsigit. Taamaammanuna naammagittaalliorluni allagaqarnermut peqataasunga.

Hanne Rasmussen taama oqarpoq. Taanna Pia Vedel Ankersenip suliunnaartussanngornera pillugu Ilisimatusarfiup pisortaanut Tine Parsimut naammagittaalliuummik allagaqartunut ilaavoq. Hanne Rasmussenip ilinniartullu allat ilinniartitsisup soraarneratigut ilinniartinneqarnermik ajorseriaqqinnissaa siornatigutullu atuartitsinerup pitsaannginnerulernissaa ernummatigaat.

Tamatuma nammineq silarsuaarannguatsinnik isumaginneqqilernissarput kingunerissagunarpaa, assersuutigalugulu ilisimatusarnermik sulianut, isumasiuilluni misissuinernut aammalu sorpassuarnut Pia-p uagutsinnut iserfigitittagaanut akuutinneqarunnaassaagut.

Ilinniartut oqaatigaat, Pia Vedel Ankersenip atuartitsineratigut periarfissanik nutaanik paasisaqarsimallutik, tamatumalu siornagut atuartinneqarnikuunertik illuinnaasiorlunilu amigaateqarsimaqisoq. Lone Rosengreen Pedersenip, Hanne Rasmussenitulli siornatigut atuartinneqarnertik aamma Pia Vedel Ankersenip atuartitsinera misilittagaqarfigai, assigiinngissusaallu angingaarmat kamaammertarpoq.

- Kamaammernartarpoq, tassami eqqarsaatigilersarpara naammassiguma sulilerlungalu taamaallaat atorfilittatut suleqatitulluunniit pikkorippallaanngitsutut inissisimassaanga taamatullu misigisimarusunngilanga. Ilinniartitaaneq qaffasissoq nunani allanisulli qaffasissusilik atugaasorlu piumavara.

Pia Vedel Andersen sioqqullugu ilinniartitseriaatsimi atorneqartumi taama pissarsiaqartarnak misigisimavit?

Aappi, tassami Pia sioqqulluguli atuagassat amerlasuut taamatullu isummersorlutik allaaserinnittartut ilisimariigassaraluakka pissarsiarisimanngilakka.

Taamaattorli naammagittaalliorluni allagaqaat, Allaffissornermik ingerlatsivimmi ilinniartunit tamanit atsioqataaffigineqanngilaq, tamannali pissutissaqarluartoq, Lone Rosengreen Pedersenip oqaatigaa.

Uanga atsiortitsinermik ingerlatsivunga arlalissuillu peqataarusukkaluarlutik oqarnikuupput, kisiannili atsiornernikkut kinguneqaatissat suuneri ersissutigigamikkit taamaaliunngillat. Kingusinnerusukkullu paasinarsivoq peqqutissaqarluarsimasut.

Ilinniartut naammagittaalliorlutik allagaqaatiminni Ilisimatusarfiup aqutsisui Pia Vedel Ankersenip atorfeqaannarsinnaanera anguniarlugu iliuuseqarsimanngitsutut pisuutippaat, isumaqarlutillu Ilisimatusarfimmi aaqqiagiinnginnerup kinguneranik soraartariaqalersimassasoq. Ilanngullugu oqaatigaat, ilinniartitsisorisamik soraarneratigut ilinniartut arlallit nunani allani qaffasissumik ilinniarfiusuni ilinniarnerminnik nangitserusulernerannik kinguneqarsinnaasoq.

Pineqartoq aqagu sammeqqikkumaarparput.