Ilinniartitsisunngornissaq pilerigineqarpoq

Ilinniartitsisunngorniarlutik Ilinniarfissuarmi aallartittussat amerlapput.
Allattoq Noah Mølgaard
aggustip 17-at 2011 08:50

Siunissami meeqqat atuarfianni ilinniartitsisuulerumaartussat atualeqqaassapput sisamanngorneq aggustip 18-iat ininullu ilinniartitsiffiusunut isaasussat amerlassapput.

- Ilinniartut nutaat 60-it missaanniissapput, Ilinniarfissuarmi rektori Dorthe Korneliussen taama nalunaarpoq.

Ukiumi atuarfiusumi aallartilersumi ilinniartitsisunngorniat katillutik 265-ussapput ilinniartitsisunngorniallu aatsaat taama amerlatigissapput.

Ilinniartullu aallartittussat amerlanerat pissutigalugu inissamik ajornartorsiortoqangajappoq. Tamannali aaqqinneqarallarpoq atuarfitoqanngortoq Qorsussuaq meeqqat atuarfiattut atorunnaarmat. Ilinniartitsinerit ilaat taamaasillutik Qorsussuup initaani ingerlanneqartussanngorput.

Najugarisaq qimanngikkaluarlugu ilinniartitsineq aamma ingerlaqqissaaq. Januaarimi tassani aallartittussat 25-iussapput.