Ilinniartitsisunngorniartut piviusumiilernissamut ernumasut

Ilinniarfissuarmi ilinniartut naammassillutik illoqarfeeqqani nunaqarfinnilu piviusumi sulilerunik pamersaanermi sakkussanik amigaateqarnissartik ernumassutigaat. Ilinniartut marluk KNR-imut taama oqaluttuarput.

- Ilaatigut takorloorsinnaanngilara annertuumik pisoqarpat qanoq iliussanerlunga. Kisiat apeqqutaavoq nammineq misilikkukku aatsaat immaqa nammineq paasissavara qanoq iliornissara, Larsigne Filemonsen oqarpoq.

Ernumassuteqartorli taannaannaanngilaq. Ulluni makkunani KNR-imi ilinniartitsisussaaleqinermut tunngasunik paasiniaasaqattaarnitsinni nunaqarfinni illoqarfinnilu isorliunerusuni ilinniartitsisussaaleqineq paasinarsivoq.

AAMMA ATUARUK  For mange problemer og svært at forlade Nuuk

 

Kommunini ilinniartitsisut ima amerlatigisut amigaatigineqarput 
- Avannaata Kommunia: Ilinniartitsisut 18-it
- Kommune Qeqertalik: Ilinniartitsisunit 102-usussanit 18-it amigaatigineqarput
- Qeqqata Kommunia: Kisitsitsinik pissarsisinnaasimanngilagut
- Kommuneqarfik Sermersooq: Ilinniartitsisunit 329-usussanit 27-t amigaatigineqarput
- Kommune Kujalleq: Ilinniartitsisunit 102-usussanit 23-t amigaatigineqarput

Arnarulunnguaq Reimer sinerissami illoqarfeeqqani ilinniartitsisutut sulisimasunut ilaavoq. Taassuma Tasiilami ilinniartitsisutut sulinini nuannarigaluarlugu, atuartut ilinniarnermini passussinnaalersimasaaniit ilungersunarnerusumik ajornartorsiuteqarmata soraarsimavoq.

Pamersaaneq samminngippallaaraat

Ilinniartitsisunngorniarnermilu meeqqanut pisariaqartitsisunut immikkut ilinniarnissap amigaataanera Larsigne Filemonsenip  Paninnguaq Davidsenillu aamma tikkuarpaat. Taakku marluullutik ilinniartitsisunngorniarnertik nuannareqaat, taamaattorli amigaateqarsoripput:

- Naammanngilaq. Tassami, naammaginngilara pissutsit massakkut taamaatillugit, taama perorsaaneq initutigisoq massakkut atuarfinni. Taavalu uagut atuartitsinissaq fagini taakkunani taama sammitigalugu naammaginngilara. Perorsaanertaa annikipporluunniit, Larsigne Filemonsen oqarpoq.

Taassuma ilanngullugu oqaatigaa suliffimmi sungiusarluni misilliinermini meeqqanik immikkut pisariaqartitsisunik naammattuuisimalluni, akunnattuungananngitsoorsimanngilarli taamatut nalaataqariasaarluni. Taamaammat sulileruni nammineerluni akisussaaffigilerunigit qanoq qisuariaateqartarnissani nalornissutigivaa. Paninnguaq Davidsenilu isumaqataavoq.

- Atuarfinni misiliigaangatta naammattuuisarpugut taamaattunik arlaatigut ajornartorsiuteqartunik. Kisianni imannak suliassat uagut toqqaannaq tiguneq ajorparput. Ilinniartitsisuisa isumagisarpaat. 

Ilinniartitsisut tupaallattarput

Ilinniartitsisut atuartunik immikkut pisariaqartitsisunik sullissinissaminnik naammattumik piareersarneqarsimanngitsut IMAK-imi siulittaasup ilisarisinnaavaa.

- Pingaartumik ilinniartitsisunngorlaat nunagisaminnut uterlutik sulileraangami tupassinnaasarput. Aamma ilinniartitsisunngorlaanik peqarpoq meeqqanik immikkut pisariaqartitsisunik sullissinissaminnut piareerluarsimasunik, angajoqqaanillu suleqateqarluarsinnaasunik, IMAK-imi siulittaasoq Birthe Møller Therkildsen KNR-imut pingasunngormat oqarpoq. 

Britta Lohmann Iliniarfissuarmi pisortaavoq, taanna isornartorsiutinut apersorneqarnikkut akissuteqarnissaminut suli periarfissaqarsimanngilaq, KNR-imulli  mailikkut allappoq:

- Ilinniarfissuarmi ilinniarnissamut malittarisassani 2014-imeersumi immikkut perorsaanermut tunngasoq ilaavoq, tamatumalu ilinniartut meeqqanik immikkut pisaqartitaqartunik atuartunullu ilikkagaqarniarnermut ajornakusoortitsisunut suliaqarnissaannut sakkussarissaartippai. Tamannali sammisamik tamatuminnga toqqagaqarsimasunuinnaq atuuppoq. Ilinniartut tamarmik tamatuminnga ilikkagaqarnissaat nassuerutigigatsigu, atuartitsissut taanna 2018-imiilli tamanut pinngitsoorani atuagassaalerpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl