Ilinniartitsisunngorniartarnerup qaffasissusaata misissorneqarnissaa kissaatigaa
Ilinniartitsisunngorniartartut naammattunik sakkussaqarlutik ilinniakkaminnik naammassinnissinnaanissaat, Andreas Uldumip kissaatigaa.
Ilinniartitsisunngorniartarnerulli assigiinngitsutigut ullumikkut nalilersorneqartarnera tikkuarlugu siunnersuut Naalakkersuisunit ilalernartinneqanngilaq:
- Ukiuni kingullerni nalunngilarput meeqqat atuarfianniit soraarummeertartut karakteererisartagaat appasittut, ammullu ingerlanikuusut, qujanartumik kisianni soorlu massakkut illuanut saakkiartoraluartoq. Kisianni tassani arlaatigut ilinniartitsisut sakkussaminnik naammattunik pisarnersut misissorneqarnissaa suliakkiissutigerusuppara, meeqqat atuarfiata ingerlanera nukittorsarneqarniassammat, Demokraatit sinnerlugit Inatsisartunut ilaasortaq Andreas Uldum oqarpoq.
Siunnersuut Nunatsinni ilinniartitsisunngorniartarnermik isornartorsiuinertut isigineqassanngitsoq, taassuma erseqqissaatigaa, ilinniartitsisunngorniartarnerulli sapinngisamik qaffasinnerpaaffimminiitinneqarnissaa anguniagaalluni, Andreas Uldum oqarpoq.
Naalakkersuisulli siunnersuut taamaakkaluartoq ilalernartinngilaat, Nunatsinni ilinniartitsisunngorniartarnerup Naalakkersuisut Ilinniartitsinermut Pilersaarutaanni II-mik taaneqarsimasoq aqqutigalugu assigiinngitsutigut nalilersorneqartarnera matumani oqariartuutaalluni. Naalakkersuisulli siunnersuummut akissuteqaataat, Andreas Uldumip naammaginngilaa:
- Naammaginngilara, naammaginngitsorujussuuara. Soorunami suna tamarmi misissorneqarsinnaavoq, kisianni misissuinerit aamma kinguneqartinneqartartussaapput, taanna uanga tunngavigalugu siunnersuutigivara. Msissuisoqariarluni, taava taassuma kingorna taakku nalilersorneqarnikut qanoq ilillutik piviusunngortinneqarsinnaanersut, imaluunniit siunnersutit pitsanngorsaatissamut qanoq piviusunngortinneqarsinnaaneranut kingunissat saqqummiunneqassasut aamma, Demokraatit sinnerlugit Inatsisartunut ilaasortaq Andreas Uldum taama oqarpoq.
Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen oqaaseqartinniaraluaratsigu iluatsinngilarput.
Taanna Inatsisartuni ullumi ullaap tungaani nalunaaqutaq aqqanermut Inatsisartunit akunnermi ataatsimi apeqqarissaarfigineqarpoq.
Ilinniartitsisunngorniartarnerup EU Kommissionimik ilaatigut suleqateqarluni ingerlaavartumik nalilersorneqartarnera, Siumut sinnerlugu Inatsisartuni ilaasortap Per Berthelsenip, Inatsisartut Ilinniartitaanermut Ataatsimiititaliaanni aamma ilaasortaasup oqaatigaa. Nunatsinni ilinniartitaanerup qaffassarneqarnissaa pillugu EU-mit ukiumut 50 millionit koruuninik aamma aningaasaliisoqartarpoq.
