Ilinniartitsisunik saassussinerit qaqutigoorput

Nuummi Ilinniarnertuungorniarfimmi ilinniartup angutip 24-nik ukiullip linniartitsisumik saassussinera immikkut illuinnartuusoq GU-mi pisortaq Henning Ditlevsen oqarpoq.

- Pisoq taamaattoq siornatigut misigisimanngilarput, uagullu pisussaaffigaarput ilinniartut toqqissisimanissaat pillugu nassuiaateqarfigissallugit, Henning Ditlevsen nassuiaavoq.

Ilinniartut katersortinneqarsimapput, nassuiaateqqissaarneqarsimappullu qanoq pisoqarsimanera pillugu, pisorlu ilinniarfiup tungaaniit akuersaarneqarsinnaanngilluinnartoq nassuiaatigineqarpoq, ilinniartullu amanna toqqissiallaatigigaat, Henning Ditlevsen oqarpoq.

Ilinniartoq mianersoqqussummik tunineqarnermi kingorna ilinniartitsisuminik saassussisimavoq.

Maanna politiinit tigummineqarallarpoq, atorfilittamik sulisumik annersaasimasutut marloriarlunilu ilinniartoqatiminik sioorasaarisimasutut unnerluutigineqarluni.

24-nik ukiulik ilinniarfimmiit anisitaavoq, illoqarfigisaminullu angerlartinneqarnissaanut billetsimik neqeroorfigineqareerluni, kiisalu tarnip pissusaanik ilisimasalimmik oqaloqateqarnissaanik neqeroorfigineqarluni.

Ilinniartitsisua tupassimagaluaqaluni maanna pitsaanerulersimavoq, ullunilu qaninnerni suliartoqqissinnaanissaa naatorsuutigineqarpoq.