Ilinniartitsisoq: Innarluutillit qinikkanit eqqumaffigineqanngippallaarput
Taassuma ilaatigut immikkut atuartitsisartut ilinniaqqittarnissannik aallussinissaq kaammattuutigaa, meeqqanut inuiaqatigiinnullu pitsaaqutissaqartoq, isumaqarluni. Kaj Rosing Carlsen Qinersisartut nipaannik taallugu Radioaviisip nangeqattaagaani oqaaseqartipparput:
- Aporaaffeqartarpoq. Toqqissisimanngitsumik misigisimasarpugut. Allamut saaqqajaasut. Ilaat tassanngaannartumik iliuuseqartaramik, misigissuseqannginnermik peqarlutik, taamalillutillu akornusersuutilerlutik, Kaj Rosing Carlsen taama oqarpoq. Taassuma atuartut autismeqartut, ADHD-qartut, Aspergers syndromerqartut kiisalu aamma atuartut sumiginnaagaasimallutik autsimeqartutut pissuseqartut atuartitarivai.
Nunarput tamakkerlugu immikkut atuartinneqartut ukioq atuarfiusoq 2006 - 2007-imi katillutik 948-iupput. Meeqqat ukioq taanna naliginnaasumik atuartinneqartut sanilliukkaanni 10.688-iupput. Tassalu atuartut tamarmik 9 procentingajai naliginnaasumik annertusisamilluunniit immikkut atuartinneqarsimasut, Inerisaaviup nalunaarusiaani 2007-meersumik atuarneqarsinnaavoq.
- Politikerit innarluutinik ilisimasaqarnerulertariaqarput, taamalilluni ajornartorsiut iternga tikillugu suliarineqarsinnaalissagami. Taava aamma immikkut atuarfiliortoqarsinnaavoq. Assersuutigalugu Nuummiinnaq immikkut artuartinneqartut aqqanillit missaanniimmata, atuarfik taamaattoq inissaqakuttoorpoq. Taamalilluta meeqqat torersumik atuartissinnaalissagaluarpavut, ilinniartitsisoq oqarpoq.
Kaj Rosing Carlsen aamma isumaqarpoq, iliniartitsisut innarluutit assigiinngitsut pillugit pikkorissartuarneqarnissaannut politikerit aqqutissiiuussisariaqartut, soorluttaaq innarluutillit angajoqqaavisa ilisimasaqarnerulernissaat aamma aqqutissiiuunneqartariaqartoq.
- Inernerilerumaassagaluarpaa, meeqqat toqqissillutik atuarsinnaanerat, ilikkagassaminnik ilikkarsinnaanerat, kiisalu siunissami toqqissillutik inuuneqarsinnaanerat, Nuummi Atuarfik Samuel Kleinschmidtimi immikkut annertusisamik atuartitsinermi ilinniartitsisoq Kaj Rosing Carlsen taama oqarpoq.
