Ilinniartitsisoq atuartunik persuttaasartutut nalunaarutigineqarpoq
Atuartut ilaasa ilinniartitsisumit ersiortinneqarlutillu annersinneqartarsimammata, angajoqqaajusut naammagittaalliuuteqarput, ilinniartitsisullu soraarsinneqarnissaa pillugu atsioqatigiissuteqarlutik.
Atuarfiulli aqutsisua ilinniartitsisoq pineqartoq soraarsinngimmagu, angajoqqaajusut suusupagineqartut misigisimapput. Naallu ilinniartitsisoq pineqartoq nammineq soraarniuteqareeraluartoq, suliaq suli politiiniippoq angajoqqaajusullu utaqqiuarsinnarput, Marie Heimerilu taakkununnga ilaavoq.
- Ilinniartitsisoq taanna meeqqatsinnut ilinniartitsisuujunnaarmat toqqissisimanarpoq, meeqqavut toqqissisimasumik aamma atualersut malunnarpoq, kisianni taamatut pisoqaqqissagaluarpat ernumanarpoq. Taamaammat meeqqat taama pineqartut kajumissaarumavagut angajoqqaaminnut ingerlaannaq oqartassasut, Tasiilami Alivarpimmi atuartuutilik Marie Heimer, taama oqarpoq.
Atuartut 2.klassimi upernaaq atuartuupput. Meeqqat ilaat toqqusaamikkut tiguneqartarsimapput, timimikkullu talimikkullu sakkortuumik tiguneqartarsimallutik, suaartarfigineqartarlutik, kridtinillu millooorneqartarlutik.
Ilinniartitsisup taamaaliortarsimanera meeqqat ilaasa atuariartorusukkunnaaraluarnerannik kinguneqarpoq, ersiortinneqarnertik pissutigalugu atuariartorusukkunnaaraluaramik.
Kommuneqarfik Sermersuumi atuarfeqarnermut pisortaq Hans Peter Broberg, oqarpoq inuit ataasiakkaat pillugit oqaaseqarsinnaanani, ilinniartitsisulli atuartunut nakuuserniartartut akuerisinnaanngilluinnarnerarlugit. Taassuma aamma oqaatigaa ajornartorsiutit oqaloqatigiinnikkut aaqqiiviginiarneqartartut.
- Angajoqqaajusutut neriuutigaara tamanna ilumoortoq, meeqqavummi toqqissisimanartumik atuartuusinnaanissaat kissaatiginaqaaq, Marie Heimer oqarpoq.
Ilinniartitsisoq meeqqanut nakuuserniartarsimaneragaasoq naammagittaalliuuteqarnerup kingorna qaammat ataaseq qaangiummat nammineq soraarniuteqarpoq aallarlunilu.
Angajoqqaajusut ilinniartitsisumik tunniussinerannut suliaq politiinit ingerlanneqartoq, Tasiilap politiivini politiassistentip Jesper Vestergaardip uppernarsarpaa.
