Ilinniartitsisoq: Angajoqqaat meeqqaminnut tusarnaarnerusariaqarput

Atuartut akornanni qinngasaaruttarneq illoqarfinni annerusuni malunnarnerulersimavoq, angajoqqaallu ulapippallaartut meeqqaminnullu tusarnaarluarnissamut piffissaqarpianngitsut amerlanerulersimapput. Ukiuni 20-ini ilinniartitsisoq, Rikke Grønvold, maanna Nuummi Kangillinnguit atuarfianni ilinniartitsisuusoq, atuartut akornanni qinngasaaruttarnermut iliuuseqartarnermik misilittagaqarluartoq oqarpoq qinngasaaruttarneq ersarinnerulersimasoq:

- Illoqarfiit assigiinngittut najortarnikuullugit Nuummut uteqqilluni malunnarpoq, naluara annertusinerustut oqaatigisariaqarnersoq, kisianni qinngasaaruttarneq ersarinnerulersimasutut oqaatigisariaqarpoq.

Rikke Grønvold isumaqarpoq angajoqqaat inuiaqatigiillu meeqqanut piffissaarunnerat qinngasaarunnerup malunnarnerulerneranik kinguneqarsimasoq.

- Kisianni meeqqat siornatigut qinngasaarneqarnertik pillugu nipangiinnartaraluartut massakkut oqallinneq sungiukkiartorpaat. Siornatigut atuartitsineq imaakkaluarpoq ilinniartitsisoq oqalulluni meeqqat nipangerlutik, massakkulli malunnarpoq meeqqat isummaminnik annisserusunnerulersimasut.

Angajoqqaatut maluginninniarnissaq pingaaruteqartoq Rikke Grønvold oqarpoq.

-Angajoqaatut maluginiagassaavoq meeraq soorlu naarluttalerpat merianngusarlunilu atuariartornissani ornigiunnaarpagu, taanna takussutissani siulliusarpoq. Taava meeqqap oqaatiginiagaanut tusaaniarnissaq pingaaruteqarpoq taavalu oqaatigisaa annertuppat atuarfimmut apuussinissaq aamma pingaaruteqarluni.

Ilinniartitsisut meeqqanik 20-it pallillugit amerlatigisunik ullut tamaasa atuartitsisarput, akunnerillu marluk ingerlanerinnaanni ilinniartitsiitigalutik meeqqanik ataasiakkaarlugit oqaloqateqarsinnaasanngitsut Rikke Grønvold erseqqissaavoq.

- Taamaattumik angajoqqaat maluginiaanerat pingaaruteqartupilussuuvoq. Taamaattumik meeqqat oqaatiginnittutut naqissusernagit meeqqap oqaatiginiagai oqallisigilluariarlugit aturfimmut apuussisarnissaq pingaaruteqarpoq, angajoqqaallu eqqumanerusariaqarput, qinngasaarunneq sivisuumik ingerlareersoq aatsaat ilaanni paasisaratsigu.

Qinngasaarunneq amerlanertigut anitsiarfinni pinerusartoq Rikke Grønvold oqarpoq.

Qinngasaarunneq sumerpiaq peqquteqartarnersoq apeqqutigigatsigu ima akivoq:

- Tassa assigiinngitsunik patseqartannguatsiarpoq, kisianni meeqqat ilaasa nalusarpaat oqaatsit anittakkatik allanut ajuallannartuunersut. Uanga atukkajuttarpara, atuartuutikka ukiumut arlaleriarlugit ataasiakkaarlugit oqaloqatigisarlugit. Tassani nuannarinngisaminnik annissuisinnaasarlutik. Taamaattumik Rikke Grønvold isumaqarpoq atuartut angajoqqaatulli ataasiakkaarlugit oqaloqatiginnittarneq angusaqarfiulluartartoq.

- Tassuuna paasivakka sorparujuit ilinniartitsoqatima immaqa malugisimanngisaat. Taamaalillunilu oqallinneq aallartittarpoq ippigisallu tamarmik anninneqarsinnaanngorlutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat