Ilinniartitaanerup ineriartortinneqarnissaa tamarmik qineqqusaarutigaat

Aamma nunaqarfinni meeqqat atuarfiini atuartunik, attaveqaatit elektroniskiusut atorlugit, ungasianiit atuartitsisoqartalernissaa partiit arlallit suliniutiginiarpaat.

Nunarsuarmut akuugaluttuinnarneq ilinniartitaanermi ersertariaqartoq partiit arlallit tikkuarpaat, aammali ilinniartitaanitta kulturitsinnik tunngaveqartinneqarnisaa pingaartinneqarluni.

Atassutip piumasaraa uluttut atuartitsineq 5. klassemiit aallartittassasoq, isumaqarlutillu, meeqqat atualertarnerat ukiumik ataatsimik siuartittariaqartoq, ilinniarnikkut unammilleqatigiinneq nunani tamani alliartuinnartoq malinnaavigiuassagatsigu.

Demokraatit isumaqarput, Nunatsinni ilinniafiit nunani tamalaani ilinniakkanut naleqqussartariaqartut, iliniartut nunani allaneersut nunatsinni ilinniarsinnaalerniassammata, aammali inuusuttortavut nunani allani akuunissamut periarfisdsaginerulerniassammata.

ilinniartitaanerit pitsaassutsimikkut nunanut allanut nallersuunneqarsinnaanissaat aamma Siumup pingaartippaa. Siumulli aamma ilinniarfiit mikinerusut nunatsinniittut kattussuunnissaat anguniarpaa. Sulisut assigiinngitsut ataatsimuulersinnerisigut ilinniakkanik nutaanik aallartitsisarnissat ajornannginnerulissasoq, Siumut ilaatigut isumaqarpoq.

Sorlaat Partiiata ilinniartut suliffeqarfinnut sukkasuumik attaveqalertarnissaat pingaartippaat, ilinniartut taamaalilutik sungiusaammik sulilernissaat qulakkerumallugu.

Kattussseqatigiit Partiiat ilinniartitaanermut aningaasaliissutit kaffakkumavai, ilinniagaqartullu kattuffii peqatigalugit ilinniartitaanerit pilersaarutigalugit.

Inuit Ataqatigiit politikkeraat, ilinniartitaanerit suulluunniit nunatsinni atugarisaasunik, kulturimik, oqaatsitsinnik oqaluttuarisaanitsinnillu aallaaveqassasut, taakkuali aammma nunarsuarmi sumiluunniit unammillersinnaanissaat qulakkerumallugu.