Assi: ili ili

Ilinniartitaanerup iluani sukaterinissaq pillugu oqallitsitsilersut

Kalaallit ilisimatusartut peqatigiiffiat Ili Ili Nuummi Katuami unnugu nalunaaqutaq 18.30 oqallitsitsissaaq. Inatsisissatut siunnersuut nutaaq, ilinniartut ilinniakkaminnik sukkanerusumik naammassinnittarnissaannik siunertaqartoq, ilaatigut ilinniagaqarnermut atatillugu taarsigassarsiaqarnermut malittarissat sukaternerisigut, oqallisigineqassaaq.

Inatsisissatut siunnersuummi taarsigassarsisoqarniariartoq taarsigassarsiat erniaqartinneqarlernissaat siunnersuutigineqarpoq - ullumikkutut ilinniarneq aatsaat naammassippat pinnagu.

Ilinniagaqarnermut atatillugu taarsigassarsiat akilersorneqarnerinut tapiissutit pillugit malittarisassat aamma sukaterniarneqarput.

Inatsisip nutaap atuutilerneratigut inuusuttut ilarpassuinut ilinniakkaminnik naammassinninnissaminnik ajornakusoortitsilersinnaanerat ILI ILI-p ernumassutigaa. 

Kommuneqarfik Sermersuumi Isumaginninnermut, Suliffeqarnermut Inuussutissarsiuteqarnermullu Ataatsimiititaq tamatumunnga isumaqataavoq.

Ilinniagaqarnersiutit pillugit inatsimmik allannguinerup inuusuttunik tunngavissaqarpallaanngitsunik annertuumik eqquisinnaanera ernumassutigalugu Ilinniartitaanermut naalakkersuisoqarfimmut tusarniaanermi akissuteqqaatimini taama allappoq.

- Inatsisissatut siunnersuutip inuusuttut artorsareersut siusissukkut ilinniakkamik aallartitsisinnaasimanngitsut allannguutit pillaatitut isigissagaat ernumassutigaarput, ataatsimiititami siulittaasoq Inuit Ataqatigiinneersoq Malene Lynge taama allappoq.

- Taamaalilluni siusinnerusukkut piffissarluunniit eqqorlugu ilinniakkamik naammassinninnissamut kajumissuseqassanngillat, ataatsimiititaq tusarniaanermi akissuteqaatimini taama allappoq.

ILI ILI-p oqallitsitsinera Katuami unnugu nal. 18.30 aallartissaaq, inatsisissamillu siunnersuuteqartoq Naalakkersuisoq Nivi Olsen ataatsimiinnermi aamma najuutissaaq.

 

ILI ILI-p unnugu oqallitsitsinissaminut pilersaarutaa



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl