Ilinniartitaanermi internet atortariaqarparput
2007-miit 2010-p tungaanut internetikkut ilinniagaqalersunit 12-init 9-t ilinniakkaminnik naammassinnipput, taakkualu ilinniarnerminnut atatillugu ukiumut pingasoriarlutik kattulutik atuagarsortarlutik. Tamanna ingerlateqqinneqarsinnaavoq, Martha Lund Olsen isumaqarpoq.
- Inunnik isumaginninnerup iluani siunnersuisartut, perorsaasut tarillu pissusaanik ilisimasallit amigaataanerat ullut tamaasa tusartarparput. 2012-imi upernaakkut Aalborgip universitetiani ilinniartut Nuummi suliffissarsiuussisarfimmi pissutsit pillugit misissuipput. Misissuinermi paasineqarpoq inunnik isumaginninnermi sullissisut akuttunngitsumik suliassat 300-niit 400-t tungaannut suliarisaraat, Martha Lund Olsen nassuiaavoq.
Inunnik isumaginninnermi sullissisut perorsaasullu taamaammat ulapputqarpallaarlutik sulisinnaajunnaajaarnerusarput. Tamatuma kinguneranik tamakkua allanik suliffissarsiortarput sullissisussat akornanni taarseraattoqaqaaq. Taamaammat ullumikkut internetikkut periarfissat neqeroorutigineqartut saniatigut ilinniarfissanik amerlanerusunik pilersitsisoqartariaqarpoq.
- 2012-imi ukiakkut Nuummi inunnik isumaginninnermi ingerlatsvik aamma misissuivigineqarpoq, tassanilu uppernarsarneqarpoq, meeqqat pillugit sullissisut ilaat suliassanik 100-t sinnilinnik isumagisaqartartut. Perorsaanerup iluani sulisoqarniarneq aamma taamatut isikkoqarpoq. Taamaammat eqqumiigineqarsinnaanngilaq meeqqat, sivisuumik suliffissaaleqisut, siusinaarlutik sulisinnaajunnaarnersiutillit utoqqaallu pisariaqartitsinertik naapertorlugu sullissinneqarsinnaanngillat, Martha Lund Olsen naqissusiivoq.
