Ilinniartitaaneq ataqatigiinnerusumik ingerlalertariaqarpoq

Nunatsinni ilinniartitaanermi maannamut angusat appasippallaaqaat. Tamanna pillugu ”Isummersuisissat” Naalakkersuisunit siorna februaarimi pilersinneqarput, ilinniartitaanermi ajornartorsiutinik qulaajaasussat. Ukioq ataaseq qaangiuttorlu Isummersuisit nalunaarusiaat aqqaneq marlunnik immikkoortulik ullumi saqqummiunneqarpoq.

- Nalunaarusiorpugut pissutigalugu nassuerutiginikuugatsigu ilinniartitaanikkut angusartakkagut annikippallaartut, soorlu assersuutigalugu meeqqat atuarfianniit anisartut kisitsinermi, atuarnermi angusaat annikippallaaqaat, Henriette Rasmussen oqarpoq. Ilinniarfinnissaaq angusat qaffattariaqarnerarpai:

- Amerlanerusut ilinniarnermik aallartitittarusuppagut. Taava qanoq iliussaagut inuit taakku anguniarlugit? Sooruna angusagut taama annikitigisut? Qanoq iliussaagut angusaqarnerujumalluta? Tassa tamakku appequtit nalunaarusiami akineqarsimanissaat neriutigaara. Tamatumunnga atatillugu meeqqat atuarfiannut isertigatik meeqqat qanoq piareersimanissaat aamma nalunaarusiami sammineqarpoq.

- Aamma inuusuttut ilinniakkaminnik naammassereerlutik suliffeqalersut ilisimasaat aamma qaffattariaqarpoq, taava qanoq iliussaagut tamanna angujumallugu, tassa tamakuupput Isummersuisit nalunaarusiami innersuussuteqarfigisaat.

Alloriarnermi tullermi ataqatigiissaarineq ingerlanneqassasoq Henriette Rasmussen oqarpoq.

- Kisianni isumaqarpunga tigussaasumik alloriarneq tassaasariaqartoq ilinniartitaanerup ataqatigiissaakkamik aallarnissaa.

Ilinniartitaanermut Pisortaqarfimmit oqaatigineqarpoq Isummersuisit aqqanilinnik inuttaqartut nalunaarusiaat katillugit 160.000 koruuninik akeqarsimasoq.