Ilinniartitaaneq aalisarnerlu suleqatigiissutiginiarsigik
Ilinniartitaanermut tunngatillugu siunnersuisoqatigiit siunnersuutigaat nunat pingasuusut akunnerminni ilinniarnertuunngorniarfitsigut paarlaateqatigiittarnermik aallartitsissasut. Matumanilu siunnersuutigineqarpoq, naalakkersuinikkut oqartussat suliniummut taamaattumut atugassanik aningaasanik immikkoortitsissasut.
Nunat Avannarliit Killiit Siunnersuisoqatigiivisa aamma innersuussutigaat, nunat avannarliit killiit ilisimatusarnermut tunngasutigut aamma inuussutissarsiutitaarniarluni ilinniartitaanikkut suleqatigiinnerat nukittorsarneqassasoq. Tamatumunnga peqatigitillugu siunnersuisoqatigiit aamma tikkuarpaat ilinniaqqittarnerit suliffimmillu misiliinernik aaqqissuussisarnerit nunani pingasuusuni inerisarneqartariaqartut, taamaalilluni innuttaasut sanngiinnerusut pitsaanerusumik inooriaaseqalernissaat pitsaanerusumillu suliffissarsisinnaanissaat periarfissinneqarniassammat. Siunnersuisoqatigiit aamma siunnersuutigaat, Nunani avannarlerni killerni ungasianit atuartitsinermut tunngatillugu aaqqissuussaanerusumik suleqatigiittoqalissasoq.
Nunani Avannarlerni Siunnersuisoqatigiit aalisarnerup 2010-mi pingaarnertut sammineqarnissaa aamma kissaatigaat. Matumani juunimi aalisarneq pillugu ataatsimeersuartoqarnissaa siunnerfigineqarpoq. Tamatumunnga atatillugu Siunnersuisoqatigiit tikkuarpaat, aalisarneq Savalimmiunut, Islandimut Kalaallillu Nunaannut pingaaruteqartorujussuummat, aamma nunat taakkua akunnerminni aalisarnermik aqutsinerisa assigiinnginnerisa ataqatigiissaarneqarnissaannik periarfissarsiuussisoqartariaqartoq. Ataatsimeeqatigiinnermi nunat taakku pingasut aalisagaqassusaannik nalunaarsuisoqarnissaa aalisarnerullu inuiaqatigiinnut nunani avannarlerni killerniittunut aningaasaqarniarnikkut pingaarutaanik erseqqissaanissaq siunniunneqartut ilagaat. Nunat Avannarliit Killiit Siunnersuisoqatigiivi isumaqarput ataqatigiissaarisoqarneratigut Savalimmiut, Island aamma Kalaallit Nunaat EU-p aalisarnikkut politikkianut nukittunerusumik inissisimasinnaassasut.
Aamma Nunat Avannarliit Killiit Siunnersuisoqatigiiffiata, anersaaruluutimittut, Nunat Avannarliit Siunnersuisoqatigiivi aamma Nunat Avannarliit ministerrådiat, pisortatigoortumik oqaaseqatigiiliaminni "nunanik aamma nunanik namminersorneruffiusunik" oqaaseqatigiiliortarunnaaqqullugit kajumissaarpaat. Tamatumunnga taarsiullugu Nunat Avannarliit Siunnersuisoqatigiivisa aamma Nunat Avannarliit Ministerrådiata oqaaseqatigiiliaminni "Naalagaaffiit nunallu" atortassagaat kajumissaarutigineqarput, taamaalilluni "nuna"-nik oqartoqaraangat Savalimmiut Kalaallillu Nunaat ilanngunnagit isumaqartitsiniartarneq atorunnaarniassammat.
Oqaatsinik atuinissamut tunngasut tamakkua maani Nunatsinni tusarfiginerusalissajunnarsivavut. Tassami Inatsisartut siulittaasuat Josef Motzfeldt naatsorsuutigineqareersutut ukiumi tulliuttumi Nunat Avannarliit Killiit Siunnersuisoqatigiiffianni siulittaasutut qinigaammat. Taamaalilluni nunat ilaasortaasut paarlakaallutik siulitaasuutitaqartarneranni, Savalimmiormiu lagtingimut ilaasortaq Kári P. Højgaard taarserlugu siulittaasunngormat.
