Ilinniarsimassutsikkut kalaallit kingursimapput

Nunani atlantikup avannaaniittuni pingasuusuni Kalaallit Nunaat ilinniarsimassutsikkut kinguarsimanerpaavoq. Amerlavallaat qaffasissumik ilinniarnissartik suli soqutiginngippallaarpaat kalaallillu pingasuungaangata marluk qaffasinnerpaamik atuagarisimasarpaat meeqqat atuarfianni atuarsimanertik. Kalaallit Nunaanni ilinniagallit 20-jungaangata ilinniarluarsimasoq ataasiusarpoq. Nunani Kalaallit Nunaannut qanittuni, Savalimmiuni Islandimilu, ilinniarsimasut tallimaangaangata ataaseq qaffasissumik ilinniarsimasuusarpoq. – Taamaattumik ilinniarsimassutsimik qaffassaanissaq Kalaallit Nunaanut pingaarluinnartuuvoq, taama oqarpoq professor Christen Sørensen, atuagassiamut Samfundsøkonomimut. Kalaallit Nunaata aningaasarsiornera pillugu ministeriunerup siunnersuisartuini Christen Sørensen siulittaasuuvoq.

Kalaallit napaniutigisatoqaat ukiualunnguit ingerlanerini ikinnerusunut suliassaqartitsilertussaapput taamaattumik ilinniarluarsimasuunissaq ingalluni avaqqukkuminaannerulersussaasoq Christen Sørensen aamma oqarpoq. Kalaallit Nunaanni naalakkersuisut Ilinniarsimaneq qaffassarniarlugu suliniuteqarmata Christen Sørensenip nersualaarpai oqarporli isumaginninnikkut pissutsit tamatumani mininneqannginnissaat sissuertariaqartoq, ilinniarneq inuttullu atukkat ataqatigiilluinnarmata. – Angerlarsimaffimmi ajornartorsiuteqarfiusumi peroriartorneq sutigut tamatigut killiliisarpoq taamaattumik ilinniarusuttut pitsaanerpaamik atugaqarnissaat ilanngullugu anguniartariaqarpoq, Christen Sørensen oqarpoq. Christen Sørensenip paasisai naapertorlugit suliffissaaleqisut quliungaangata arfineq-pingasut ilinniarsimasuuneq ajorput.