Ilinniarsimanngitsut sumiginnakkat pillugit pikkorissartut
Meeqqanik sullissisut ilinniartinneqartut siulliit Qaanaameersuupput, Tasiilameersuullutik, Illoqqortoormiuneersuullutik Nanortalimmeersuullutillu.
Sullissisullu tulliit ilinniartinneqartussat Kangaatsiarmiuussapput kingusinnerukkullu Uummannarmiut Upernavimmiullu ilinniartinneqassallutik.
Ilinniartitsisut tassaapput inunnik isumaginninnermut siunnersorti, Nukakkuluk Kreutzmann aamma tarnip pissusaanik ilisimasalik, Inuk Bourup-Nielsen.
Ilinniartitsinerit kommunini inunnik isumaginnittoqarfiit qanimut suleqatigalugit ingerlanneqarput.
Ilinniartitsinerit siunertaraat, meeqqat sumiginnakkat pillugit ilisimasaqarnerulernissaq sumiiffinnilu ataasiakkaani sullissinerit nukittorsarneqarnissaat.
Nunatsinni nunaqarfinni illoqarfinnilu minnerni meeqqanik sullissisut tassaasarput ilinniarsimanngitsut, tassalu taakku ilisimasassaasa qaffassarneqarnissaat siunertaralugu ilinniartinneqarlutik.
Meeqqanik sullissinermik ilinniarsimanngikkaanni, meeqqat sumiginnakkat qanoq sullinneqarnissaat ajornartarpoq, tassalu tamassuma qaangerneqarnissaa siunertarineqarpoq.
Avannaani nunaqarfinni illoqarfinnilu minnerni ilinniartitsinerit Villumip aningaasaateqarfianit, Villum Fonden-imit aningaasaliiffigineqarput, ilinniartullu nerisaqarneri ineqarnerilu KNI-mit tapiiffigineqarluni.