Ilinniarsimannginnermit ilinniarsimasumut
Ullumikkullu neqaarniat qulingiluat allagartartaartussanngorput, taakkulu tamarmik uliffissaminnik qulakkeerinnereerput. Kommunep Namminersorlutik oqartussat suleqatigalugit aningaasat nassaaraat. Neqaarniatullu ilinniartut Narsami INUILI-mi ilinniartinneqarnerminnut atatsillugu neqaarniatut misilitassat Neqileriffimmi Neqimi ilinniarpaat.
-Neqaarniatut ilinniartut naammassisut tulluusimaarutigeqaagut. Kommunemimi taama mikitsigisumi ilinniarlutik naammassisut taama amerlatigisut tulluusimaarutissaapput. Suleqatigiilluarsimavugut, Kommunemut, Namminersorlutik oqartussanut atuarfimmullumi qujassutissaqarluarpugut, Henning Sønderup fabrikkimi pisortaasoq knr.gl-mut taama oqarpoq.
Kommune kujallermi suliffissarsiuussisarfimmi pisortaasoq Grethe H. Nielsen fabrikkip pisortaanit kiisalu inuussutissarsiornermi suliffissaqartitsiniarnermilu ataatsimiititaliap siulittaasuanit Kalistat Lundimit nersualaarluarneqarpoq. Kalistat Lundillumi isumassarsiap piviusunngortinneqarsimaneranik iluarisimaarinnilluarpoq.
-Illoqarfitsinni neqaarniatut naammassisut tulluusimaarutigeqaagut, ilinniarnermillu kingorna neqilerivimmi suliffitaarput. Tamannalu ilinniarnerup imminut akilerluarsinnaaneranik takutitsivoq, Kalistat Lund oqarpoq.
Narsami neqileriffik siunissamut angisuumik pilersaaruteqarpoq. Neqaarniatullu naammassisut qulingiluat atorfissaqartilluarpaat. iluatitsilluartoqariarpallu suli amerlanerusunik pisariaqartitsisoqassaaq.
- Siunissami neriuutigaarput neqileriffimmi ataavartumik sulisut 30-it ukioq nallugu sulisorisinnaanissaat. Nutarterinermi maanna suliarineqaleruttorpoq. Sunalu tamarmi iluatsissappat isumassarsiat amerlasuut piviusunngortittariaqarpagut. Aappaagulu neqaarniatut ilinnialertussat aqqaneq marluk ilinniarnermik aallartis- issinnaavagut. Siunissamimi atorfissaqartissavagut, Henning Sønderup neqileriffimmi Neqimi pisortaasoq siunissamullu neriuuteqarluartoq taama oqarpoq.
