Ilinniarnetuunngorniaq inortuinngisaannartoq
- Inuit kikkulluunniit ukiut pingasut atuanngitsuunngiivillutik atuarsinnaapput, imminut piumaffigineq annertooq pigigaanni, Sisimiuni GUX-imi ilinniarnertuunngorniaq, atuanngitsuunngisaannarsimasoq Mona Jeremiassen oqarpoq.
Ilinniarnertuunngorniarlutik soraarummeertussat majip aallaqqaataata missaani naggataaq atuassapput, inaarutaasumillu misilitsinnissaminnut piareersalissallutik. Sisimiuni GUX-imi ilinniarnertuunngorniat 90-it juunip qaammataani angusissagunik ilinniarnertuunngussapput.
Taakkunani ilinniarnertuunngorniaq ataaseq, Mona Jeremiassen, ukiuni pingasuni inortuinngisaannarsimavoq, atuanngitsuunngisaannarsimavoq, ilinniagassanillu piffissaq eqqorlugu tunniussisarsimalluni.
Ilinniakkamik pimoorussinissaq meeqqat atuarfianili ilikkarsimavaa.
- Meeqqat atuarfianni naammassilluta allagartaratta atuartutsialattut toqqagaanikuuvunga. Ilimagaara taanna nukittuallaatigisimagiga, Sisimiuni GUX-imi ilinniarnertuunngorniaq Mona Jeremiassen oqarpoq.
Taassuma meeqqat atuarfianni atuartuugallarami inortuineq atuanngitsoornerlu nuannarinngisaannarlugit misigisimavai.
- Siornatigut meeqqat atuarfianni inortuisarnikuugaluarpunga, kisianni ajussutigisarlugu. Soorlu peqanngissimagaangama, ajortuliortutut immaqaluunniit paasinngitsuugaqartutut misigisarsimavunga, Mona Jeremiassen oqarpoq.
Mona Jeremiassenip GUX kisimi atuanngitsoorfigisimanngilaa.
- Piareersarfimmi atuarallarama napparsimanikuunngilanga, suliffiginikuusannilu aamma napparsimanikuunngilanga, Mona Jeremiassen oqarpoq.
Taassuma nassuerutigaa niaqorluttarsimalluni, taamaakkaluartorli uniffiginagu ullut tamaasa atuariartortarsimavoq. Aamma nassuerutigaa ilinniarnertuunngorniarluni piffissaq eqqorlugu atuartarnissaq unamminartuusimasoq.
- GU ukiup aappassaa ingerlallugu ilinniagassanik ulikkaartarpugut. Allatut ajornartumik pigaartaqattaarluta sinippiarnata ilinniakkerisarnikuuvugut. Qasulluni atuarluni ilaanni artornarsinnaavoq, kisianni anigugassaavoq, Mona Jeremiassen oqarpoq.
Kisitsisit 2013-imi oktobarimeersut takutippaat nunatsinni ilinniarnetuunngorniarfinni tallimaasuni atuarfimmut takkutinngitsoortarnerit amerlasut.
Atuarneq aggustip qaammataani aallartittarpoq, qaammatillu marluk ingerlanerinnaani atuanngitsoonerit ukiumut agguaqatigiisillugit 15 procentinngoreersimasut.
Mona Jeremiassen isumaqarpoq inuk kinaluunniit piumassusilik piffissaq eqqortuaannarlugu atuartoqarsinnaasoq.
- Kikkulluunniit ukiut pingasut atuanngitsuunngiivillutik atuarsinnaapput. Imminut piumaffiginninneq annertooq pigigaanni. Uteriikkaannilu taama angusaqartoqarsinnaavoq, Mona Jeremiassen oqarpoq.
