ASSIT Ilinniarnertuunngortut nuannattunnguupput
![](/sites/default/files/styles/image_934x467/public/article_images/gux_dimittender_2016_122.jpg?itok=lCDURo9X)
Qeqqata Ilinniarnertuunngorfiani nasartaartut allagartartaartullu 124-upput. Taakkulu angusarissaarsimaqisut GUX Nuummi rektorip oqalugiarnermini ilaatigut oqariartuutigaa. Tassami ilinniarnertuunngortut akornanni 88-riaq qaffasinnerpaamik, tassa 12-mik, karakteerinnattoqarsimavoq. 164-eriarlunilu 10-rtoqarsimalluni.
KNR-imit Nuummi ilinniarnertuunngortut alapernaalluta alakkarpagat, ataanilu assit isiginnaarsinnaavatit.
Nasartaasi qaqortut naneruutitut nunarput qaammartippaat, Inatsisartuni siulittaasup, Lars Emil Johansenip, oqalugiarnermini ilaatigut taama oqariartuuteqarpoq.
Soraarummeertunut ilaqutaasut 500-t missaanniittut allagartartaartut takuniarlugit peqataapput.
Soraarummeertut kalaallisoorlutillu annoraaqarput. Nasaqaramik kikkut nalliussineqarnersut arajutsisassaanngillat. Kusanaramik pinnerlutillu alutornavipput.
Soraarummeertut ilaat Puite Josvassen naapipparput. Taassuma nasartaareerluni siunissami suniarnerluni aaliangereersimavaa.
- Iluaq! Sivisuumik tamaviaareerlunga maanna nasartaarama oqaliallaqaanga, atuarfippulli maqaasissavara.
- Ukiut tallimat qaangiuppata meeqqat atuarfianni ilinniartitsisutut sulissallunga takorloorpara. Tassami ukioq ataaseq atuanngiffeqalaariarlunga Ilinniarfissuarmi atualernissara siunniunnikuuara, Puite Josvassen KNR-imut nuannaaqaluni oqaluttuarpoq.
![](/sites/default/files/styles/image_934x467/public/gux_dimittender_2016_102.jpg?itok=iyhgRNQL)
Naapitatta ilagaat Ilasiak Heilmann. Taanna tamaviaarnarsimaqisumik ukioq ataaseq ingerlariaqqinnissamut piareersaataasumik ilinniareerluni oqiliallassimaqisoq oqaloqatigaarput.
- Soorunami nuannaaqaanga.
- Niuernermik ilinniarfimmi aningaasaqarnermut tunngasunik ilinnialissaanga. Taassuma takutikkumaarpaa ukiut tallimat qaangiuppata sumiissanersunga, Ilasiak Heilmann KNR-imut oqarpoq.
![](/sites/default/files/styles/image_934x467/public/gux_dimittender_2016_106.jpg?itok=6bNA6MQa)
Angusarissaarnerpaatut aammalu ilaatigut oqallisaarillunilu nuannaartitsisarnerminut nersornaatisillunilu kajumissaaserneqartoq, Kasper Mathiesen, aamma naapipparput.
- Piffissaq sukkanermik naammassinera uppererpianngilara. Kisiat nuannaaqaanga.
- Ukiut tallimat qaangiuppata sumiissanerlunga takorloorsinnaanngikkallarpara. Massakkut nipilersorneq aallutilaariarlugu paasiniassavara sumut ingerlaqqissanerlunga, Kasper Mathiesen, ukiormanna karakteeriginnerpaasoq, KNR-imut oqaluttuarpoq.
![](/sites/default/files/styles/image_934x467/public/gux_dimittender_2016_124.jpg?itok=LwNnoD_P)
Anna Knudsen ilinniarnertuunngortuni naapitatta ilagaat. Taassuma siunissami suniarnerluni aalajangereersimavaa.
- Nuaaan'! Kiisami, nasartaarnini pillugu oqarpoq.
- Tusagassiortutut ilinniarusullunga qinnuteqarnikuuvunga. Neriuppungalu ukiut tallimat qaangiuppata tusagassiortunngorsimassallunga, Anna Knudsen Ilisimatusarfimmi tusagassiortunngorniarnissaminut tigusaareersimasoq KNR-imut oqaluttuarpoq.
Ullorsiortut ilagaat Christa Vahl. Taassuma ukiut tallimat qaangiuppata meeqqat atuarfianni ilinniartitsisuunissani takorloorpaa.
- Ukioq ataaseq ilinniarnera ilungersornarnikooqaaq. Ilinniagassat, atuagassat tunniussassallu ukiut pingasut ilinniagassat ukiumut ataatsimut eqikkagaagamik sukataarnarnikooqaaq. Massakkullu naammassigama tulluusimaaqaanga.
- Ikiut tallimat qaangiuppata ilinniartitsisunngorsimanissara naatsorsuutigivara, Christa Vahl nuannaaqaluni KNR-imut oqaluttuarpoq.
Ilinniarnertuunngortut naammassinerminnut uppernarsaatissatik aagaangamikkit tulluusimaartarput, ilaallu killitsilaarpasittarlutik.
Soorunalimi soraarummeertunut ilaqutaasut ilaat paggatsitsinngitsuunngillat. Meeqqat iluanaalaavissunnguatsiarput, tassami guultitaqaalummata.
Kalaallisuut kisimik takussaanngillat. Akornannimi immikkuullarilluinnarlunilu kusanalluinnarluni Savalimmiusut pikisimasoq takussaavoq.
![](/sites/default/files/styles/image_934x467/public/gux_dimittender_2016_98.jpg?itok=4oaTSoRF)
Selfiertoqanngitsuunngilaq.
Kasanarnerpaamik assiliisinnaajumallutik inissisimaffik pitsaanerpaaq pilernguttunnguuaat. Qularnanngitsumik tamarmik kusarnartumik assiliisimassapput. Tassami ilinniarnertuunngortut kusanarlutillu alutornaqigamik.