Ilinniarnertuunngorniat tamaatiinnartarnerat misissuiffigineqarpoq

Nunatsinni ilinniarnertuunngorniarfinni atuarunnaartartorpassuit ataasiinnarmik patsiseqarlutik atuarunnarneq ajortut atuarunnaartartunik misissuinerup siulliup ersersippaa.
Allattoq Carla Davidsen
marsip 23-at 2011 05:48

Ukiumi ataatsimi ilinniarnertuunngorniarlutik aallarteqatigiittut sisamararterutaat atuarunnartarput.

- Atuarunnaarnermulli patsisaasut arlaliusut imminnut attuumassuteqarput sakkortusaqatigiittarlutillu. Inuup inuiaqatigiillu pissusiinik misissuisoq, Lotte Kjær, ilinniarnertuunngorniarfinni atuarunnaartarneq pillugu nalunaarusiamik siorna saqqummersitsisoq taama oqarpoq.

Lotte Kjær nalunaarusiamini oqarpoq, patsisaasut imminnut ataqatigiissuusut, imminnullu sakkortusaqatigiittarlutik. Tamakku tassaasinnaallutik inooqatigiinnikkut ajornartorsiutit, atuanngitsoortarnerit, inuttut ajornartorsiutit, angerlarsernerit, oqaatsitigut fagitigullu ajornartorsiutit, inerisimassuseq, ilinniakkamik naleqqutinngitsumik toqqaaneq aanngajaarniutinik atornerluinermik ajornartorsiutit, atuarunnaartarnermut patsisaasutut ilaatigut tamakku taaneqarput.

Ilinniarnertuunngorniarfinni atuarunnaartartut kikkorpiaaneri oqaatigineqarsinnaanngitsut nalunaarusiami aamma erserpoq. Ilinniartut pikkorissut sanngiitsullu atuarunnaarsinnaasarput.

- Ilinniartut atuarunnaartarnerannut iliuusissamik ataatsimik peqanngilaq. Suut tamarmik imminnut ataqatigiissillugit isigineqartariaqarput, aamma ilinniagaqarneq ilikkagaqarnissamut kisimi tunngassuteqanngilaq, aammattaarli ilinniartut inuttut pissuserissaarnerat ineriartornerallu eqqarsaatigissallugit pingaaruteqarput.

- Ilinniartut naammassisartut amerlassusaat pitsanngoriartinneqassappat, ilinniartut ilinniarusussusiannut paasinninnissamut attuumassuteqarluinnartut tassaapput ilisimasaat, kulturiat, isumalluutaat inooqatigiinnermilu toqqammavii, Lotte Kjær nalunaarusiamini ilaatigut allappoq.

Lotte Kjær nalunaarusiornermini ilinniartut atuartinneqarnerini peqataasarpoq, aamma kollegiani ilinniartut, ilinniartitsisut pisortallu najugaqatigisarpai.