Ilinniarnertuunngorniat oqaatsit paatsiveerussutigalugit uniinnartartut

Ilinniarnertuunngorniarlutik atualersut affaannaasa ilinniarnertik naammassisarpaat. Kisisitsini Ilinniartitaanermut naalakkersuisoqarfimmeersuni Danmarkip Radioata aallakaatitassiaata P1 Dokumentarip pissarsiarisimasaani tamanna atuarneqarsinnaavoq.

Ilinniakkaminnik unitsitsiinnartartut amerlanerujussuinut oqaatsit pissutaanerpaapput. Inuusuttut meeqqat atuarfianni kalaallisuunerusoq atuartinneqartarput, ilinniarnertuunngorniarfinnilu danskisuunerusoq atuartitsisoqartarluni.

Tamatuma malitsigisaanik Avannaani Ilinniarnertuunngorniarfimmi Aasianniittumi atuartunit 378-iusunit 100-nit amerlanerusut ilinniakkaminnik siorna unitsitsiinnarput. Ilinniarnertuunngorniarfiup pisortaa Otto Simonsen naapertorlugu tamanna danskit oqaasiinik piginnaasakippallaarnermik pissuteqarpoq:  

- Isumaqarpunga atuartut ima aqqusaagaqarsimassasut, soorlu uanga tyskit oqaasii atorlugit ilinniarnertuunngorniarsimagaluaruma. Pitsaavallaarsimanavianngikkaluarpoq, pisortaq taama oqarpoq.

Ilinniartitaanermut naalakkersuisoq Doris Jakobsen naapertorlugu, tuluit oqaasii takornartat oqaasiini siunissami sallersaatinneqassapput.

- Isumaqarpunga tuluit oqaasii nunarsuaq tamakkerlugu atorneqartut Nunatsinni pingaarnerutinneqartariaqartut. Soorlu Danmarkimi nunanilu allarpassuarni aamma taamaaliortoqartoq, Danmarkip Radioanut taama oqarpoq.

Tamannali Avannaani Ilinniarnertuunngorniarfimmi pisortap Otto Simonsenip isumaqataaffiginngilaa.

- Danskit oqaasii salliutikkunnaarlugit tuluit oqaasii pingaarnerutinneqalerpata, taava isumaqarpunga ilinniarnertuunngorniarfimmi atuartut ukiuni tullerni amerlasuupilussuarni danskisut tuluttullu suli piginnaasakinnerulissasut.