Ilinniarnertuunngorniat isumassorneqartaraluarput
GU-mi ilinniarnertuunngorniartut atuanngitsuukulavallaat ilinniarfimminniit isumassorneqarnissaminnik amigaateqanngilluinnartaraluarput, tassami ilinniarfiit ajornartorsiut tamanna aaqqinniarlugu iliuuseqarfiginiartarpaat.
Aasianni ukioq kingulleq ilinniarlutik aallartittussat amerlanaarlugit akuerineqarsimammata inissaarutsinneqarsimapput.
Aasianni GU-mi pisortamut tullersorti Tippu Nielsen ima oqarpoq:
- Ukioq kingulleq aallartikkatta assigiinngitsunik pilersitsiortorpugut, soorlu ukioq siullertut eqqarsaatigalugit kollegianut ataatsimoortillugit ineqartippavut. Taavalu aallaarsimaartitsisarneq aamma aallarteqqipparput, kollegianilu najugaqartunut itersaattarneq atorneqarsinnaatipparput. Taakku saniatigut atuartunik nakkutilliisut pilersippagut, Tippu Nielsen oqarpoq.
Aammattaaq Qeqqani ilinniarnertuunngorniarfiup tamanna iliuuseqarfigaa.
-Ukioq manna immikkut aalajangiupparput sorg og gruppe-mik taasatsinnik pilersitsinissarput. Ajoraluartumik ukioq manna alianartumik pisoqarpoq ilinniartoq ataaseq imminormat, tamanna sinnerinut sunniuteqarpoq, Pia Rosing Heilmann oqarpoq.
- Atuarfiusoq nutaaq 2006-2007-lu aallarnerfigalugu sakkortungaatsiartumik nakkutilliinermik taaneqarsinnaasumik aallartitsissaagut. Atuartut tamarmik ullaakkut arfineq-pingasunut atuariartortassapput, aatsaallu ualikkut sisamanut soraaraangamik angerlartassallutik. Ullup qeqqaliartassappummi imaakkunnaarpoq ilaannikkut qulinoorunik aatsaat qulinut atuariartortarlutik imaluunniit marlunut soraarunik taava aatsaat marlunut angerlartassallutik. Tassa imaalivoq atuarfik piffissaq tamaat najortassavaat, Bibi Kielsen oqarpoq.
Taanna aperaarput tamanna meeqqanut paarsinertut isigineqarsinnaannginnersoq ukumi inersimasunngornissaminnut piareersartussaammata.
- Kisianni aamma eqqarsaatigissavarput inuusuttuaraapput, aamma inersimasutut taaneqarsinnaanngillat inuunermi ilinniagassanik piffissamillu nakkutiginninnissaq suli ilinniassallugu pisariaqartitsisarput. Inersimasuunatillu meeraannginnamik soqutigineqarneq isumagineqarnerlu pisariaqartittarpaat, Qaqortumi ilinniarnertuunngorniarfimmi ilinniartitsisoq Bibi Kielsen oqarpoq.
