Ilinniarnertuunngorniarfinni taamaatiinnartartut amerlaqaat
Nunatsinni Ilinniarnertuunngorniarfinni pingasuusuni, Qaqortumi, Nuummi Aasiannilu, atuarneq ukiarmi aallartimmat 600-ngajaat aallartipput, maannamullu atuartut 74-t taamaatissimapput, atuartut quliugaangata ataaseq. Taama amerlatiginerat ajunngitsortaqarlunilu ajortortaqartoq, ilinniarnertuunngorniarfinnit oqaatigineqarpoq.
Ilinniarnertuungorniarfinni ilinniartut katillugit 587-it aggustimi aallartipput. Ukiup affaa qaangiutinngitsorluunniit Aasianni 34-t, Qaqortumi 14-it Nuummilu 26-t unissimapput.
Qaqortumi Ilinniarnertuunngorniarfimmi atuartut 130-it akornanni 14-it atuarunnaareersimagaluartut, taamaattoq rektor Gregers Ågård nikallunngilaq.
-Oqartoqarsinnaanngilaq atuarunnaartoq annaane-
qartoq, amerlaqaammi atuarfitsinnut uteqqittartut, Gregers Ågård oqarpoq. Taakku ilagaat Jonna Kleist, maanna 2.G-mi atuartuusoq.
- Ingerlalluartutut misigivunga, aamma karakterit tunniunneqartartut nuannaarutigisaqaakka.
Ukioq 2000-imi GU-mi aallartikkaluarama uniinnarpunga ilinniarnera sumut atussanerlugu nalugakku, Jonna Kleist oqarpoq.
Taassuma sunngornissi nalugamiuk unittariaqarsimavoq ukiunili eqqarsarfimmini aalajangerpaa Ilinniarnertuunngorniarfimmi ilinniartitsisunngorniarniarnissi.
Ilimagisanniit ingerlalluarneroqaanga taamatut paasisaqarluni taamatullu angusaqarsinnaalluni nuanneqaqq, oqarpoq..
Jonna Kleist isumaqarpoq meeqqat atuarfiannit anilluni ingerlaannaq ilinniarnertuunngorniarneq ingerlakkuminaatsoq, pingaartumik sunngornissaq nalugaanni.
Qaqortumi Ilinniarnertuungorniarfimmi ukiut ingerlanerini atuartuutigisimasat ilaat 20-30-t atualeqqissimapput naammassillutillu.
Avannaani Ilinniarnertuunngorniarfimmi rektori isumaqarpoq uniinnartut amerlavallaartartut inuaqatigiinnullu akisuallaartut.
-Amerlasoorujussuupput. Taama atuarunnaartoqartillugu aningaasanik maangaannartitsisoqartarpoq. Eqqaamassavarput inuiaqatigiit ukiumut 90 tusind koruunit missaannik atuartumut ataatsimut aningaasartuuteqartarmata, rektor Halfdan Pedersen oqarpoq.
