Ilinniarnertuunngornialeqqaanut nikassaasarnerit inerteqqutaalerput
Qeqqata Ilinniarnertuunngorniarfiani atualeqqaarfissiortitsinerit nikanarsaataasarsimapput. Ukiumi siullermi ilinniagaqalersunut atualeqqaartitsilluni ileqqut ima sakkortutigilersimapput, qullersat tamakkua ilinniarfimmi inerteqqutigilersimallugit.
Allattoq Mads Lynge
februaarip 20-at 2009 05:30
Ilinnialerlaanik nikassaasarnerit, ernguttarnerujussuit, imermillu seqqitsarneqarnerup kingorna mobilit aserukkat, tamakkua Nuummi Qeqqata Ilinniarnertuunngorniarfiani ilinniartitsisunut qullersanullu ingasappallaalersimapput.
– Ilumoorpoq ilinniarnertuunngorniarfimmi inussianik festertitsinernik taaneqartartut inerteqqutigileratsigit. Uanga ilinniartitsisullu isumaqarpugut nikanarsaataasoq, nikassaataasoq ataqqinninnginnerusorlu 1. g-mi ilinniagaqartunik inussiaateqarneq assigiinngitsunillu nikanarsaasarneq, Nuummi Qeqqata Ilinniarnertuunngorniarfiani rektori Henning Ditlevsen oqarpoq. Sermitsiap nittartagaani tamanna atuarneqarsinnaavoq.
