Ilinniarnertuunngorlaat nasartaartorput

Ulluni makkunani ilinniarnertuunngorniat ilinniarnertuunngoraleruttorput. katillugit 159-t tamarmik nasartaassapput. Ilaat ulluni makkunani nasartaartulereersimapput kingulliillu nasassatik juuni-p 20-iani tigussavaat.

Nasartaartut ilaat ullumi alakkarpavut, Nivi Grønvold aatsaat anillalluni nasartaani atileraa oqaloqatigaarput.

- Qanoq ammartarami? Nivip narsataami puua ammarniaatigalugu pissangaqaluni oqarpoq. Sanianiipput ilinniaqataasa ilai nasartaareersimasut ilaallu suli misilitsinnissaminnut utaqqisut.

Nivi Grønvold qallunaatut misilitseqqammerluni 8-mik angusisimasoq aperaarput qanoq ingerlasimanersoq.

- Ajunngilaq kisianni ajunnginnerusinnaagaluarpoq, oqarpoq.

Nuummi ilinniarnertuunngorniarfimmi rektori Margit Motzfeldt radio aviisimut oqaluttuarpoq misilitsinnerit ajunngilluinnartumik ingerlasut, arlallillu 13-mik angusisimanerat unnersiutigaa.

Aasaq manna Nuummi ilinniarnertuunngortussat katillugit 76-iupput, kingulliullunilu nasartaartussaq juuni-p 19-iani nasassaanik tunineqassalluni.

Aasianni 50-t ilinniarnertuunngorlutik naammassissapput, kingullerlu juuni-p 20-iani nasartaassaaq.

- Ilinniarnertuunngorniat anguserusullutik piumassusaat qaffakkaluttuinnarpoq, taama oqarpoq, Aasianni GU-mi rektori Birger Lundholm.

Aammattaaq Qaqortumi GU-mi ilinniartut 33-iusut tamarmik nasartaassapput, kingulleq aamma juuni-p 19-iani nasartaassaaq.

- Laila Salling nasartaaqqammerputit, qanoq ippa?

- Nuanneqaaq qungujulanaqaaq.

Taanna unnersiorpoq oqaluttuarisaaneq pillugu misilitsinnermi 11-mik angusaqarsimalluni.

- Københavnimi septemberimiit aallartillunga inatsisilerituunngorniassaanga. Ukiut arfineq-pingasut missaat advokat-inngorniareeruma inatsisilerituutut ingerlaqqissaanga, takujumaarpara siunissami nunatsinnut uteqqikkumaarnerlunga, oqarpoq.

Laila Salling meeqqat atuarfianiitsillunili taamatut siunertaqarsimanerarpoq.

Minnerpaamik angusaqartartut ikiliartuinnarnerat GU-mi ilinniartitsisunit aamma maluginiarneqarpoq.