Ilinniarnermut EU-mit ukiumut 25 mio.euro-t

Kalaallit Nunaat EU-mit pissarsiarisartakkami qaavatigut ukiumut 25 millioni euro-nik ukiuni arfineq-marlunni tullerni pissarsisalissaaq.

Naalakkersuisut siulittaasuat Hans Enoksen oqarpoq, aningaasat qaffasinnerusumik ilinniarnermut atorneqassasut, soorlu nakorsanngorniarnermut assigisaannullu.

Aningaasat naalakkersuisut ilinniartitseqqinnermut immikkoorteriigaannut qalleqqiutaassapput, tassa ilinniarsimanngitsut ilinniagaqarnissaannut atugassatut ingammik sinerissami Piareersarfinni atorneqartunut tapiutaassallutik.

Isumaqatigiissut ukiumut 25 millioni euro-nik nalilik ukiaru septembarimit ukioq 2013-ip tungaanut tunniunneqartassapput.

Taamaasilluni EU-p aalisarnermut aningaasaliissutaasa qaavatigut ilinniarnermut atugassanik katillugu 175 millioni euro-nik nunatsinnut aningaasaliisalissaaq.

Aamma ilisimatusarnermut tunngasutigut paasisat nunatsinni katersorneqarnissaat piumasaqaatigineqarpoq.

José Manuel Barroso neriorsuivoq, EU-mi ilaasortanut paasissutissiineruniarluni ingammik puisinniartarnermut arfanniartarnermullu tunngasutigut. Ilaasortamilli pinngitsooratik IWC-mi Kalaallit piumasaqaataannut akuersinissaat piumasaqaatigisinnaanagu erseqqissaatigaattaaq.

Statsministeri Anders Fogh Rasmussen José Manuel Barrosolu Københavnimi sila pillugu 2009-mi ataatsimeersuartitsinissamut qilanaarlutik oqaatigaat.