Ilinniarnermi qiortartakkat atorneqalerput
Ingerlaqqiffiusuni ilinnialerlutik aallartittut aggustip aallaqqaataani ilinniagaqarnersiuteqarneq pillugu nalunaarusiaq nutaaq malillugu aallartissapput. Aaqqissuussineq nutaaq qiortartakkanik nassataqarpoq, tassani anguniarneqarluni ilinniartut ilinniagaqarnersiutitik namminneq akisussaaffiginerullugit ingerlattalernissaat.
Ilinniagaqarnersiuteqalertussat tamarmik ingerlaqqiffiusumik ilinniarnermik aallartitsisut qiortartakkanik 82-inik killilikkanik tunineqassapput. Qiortartakkap ataatsip qaammammi ataatsimi ilinniagaqarnersiat manna tikillugu atuuttut assigivaat, meeqqanut tapisiaasinnaasut ilanngullugit.
Claus Kleemann Namminersornerullutik Oqartussat Danmarkimi allaffeqarfianni ilinniarnermut ilisimatusarnermullu immikkoortortaani pisortaq oqarpoq, qiortartakkat atuutitinneqalernerata siunertarigaa, ilinniartut ilinniarnerminnut akisussaassuseqarnerulernissaat.
- Ilinniartut ilinniarnerminnik akisussaaffeqarnerulernissaat anguniarneqarpoq aamma Namminersornerullutik Oqartussanit ilinniagaqarnersiutisiatik qanoq atorusunnerlugit namminneq aaqqissuunnerulerniassagamikku, Claus Kleemann oqarpoq.
Ingerlaqqiffiusumik ilinnialertut ilinniarnerisa killiligaanerat aalajangersimasuuvoq, tassa qiortartakkat 82-it amerlanerpaamik pineqarsinnaammata. Ilinniarnerulli sivisussusaa apeqqutaatillugu qiortartakkanik tunisisoqartassaaq, qulaatigullu aqqaneq-marlunnik tunisisoqartassalluni.
- Ilinniarneq unitsinneqarsimappat qiortartakkat atorneqareersut qiortartakkanit killiliunneqartunit peerneqartassapput, taava ilinnialeqqikkaanni takuneqarsinnaassaaq qiortartakkanik qassinik suli peqarnerluni.
Tassa imaappoq, arlaleriarluni ilinniakkamik aallartitsisimagaanni, ilinnialeqqillunilu qiortartakkanik amigaateqartoqalersinnaavoq, Claus Kleemann oqarpoq.
Ilanngulluguli oqaatigaa, ilinniarnerup ingerlanerani aningaasarsiorfeqaraanni qiortartakkat atornerat unitsinneqarallarsinnaasoq, pisariaqartileraannilu aallarteqqillugit.
Ingerlaqqiffiusuni ilinniarlutik aallartereersut qiortartakkat atussanngilaat.
