Ilinniarfiup pisortaa: Ilinniarfiit katersornissaat pissusissamisoorpoq
- Inunnik isumaginninnermut ilinniartitaanerit assigiinngitsut pingasut maani Ilulissani ingerlappagut ukuusut: Isumaginninnermut ikiortinngorniat, socialassistentinngorniat aamma Perorsaasutut sammivilimmik bachilorinngorniat. Taamaattumik pissusissamisuuginnassaaq Isumaginninnermut siunnersortinngorniatut ilinniarneq Ilulissanut nuunneqarpat, taamaasilluni ilinniakkat taakku assigiimmik siunertaqartut ataatsimoortilerlugit.
Perorsaanermik Ilinniarfiup Ilulissaniittup pisortarigallagaa, Andreas Ejlersen taama oqarpoq.
Perorsaasutut ikiortinngorniarneq aamma inunnik isumaginninermut tunngasunik ilinniakkat assigiisssuteqarluartut Andreas Ejlersenip aamma eqqaavaa, soorlu inunnik isumaginninnermut tunngasutigut, ilaqutariit atugarliortut ikiorneqarnissaasigut amma tarnip pissusaannik ilisimasaqarlualernikkut.
Ilisimatusarfiup pisortaata, Tine Parsip inunnik isumaginninermut ilinniarfiup Ilulissanut nuunneqarnissaa akerleraa, oqarluni ilinniagaq tunngaviatigut appariassasoq. Tine Parsip taama oqarnera Andreas Ejlersenip isumaqatiginngilaa.
- Isumaginninnermut ikiortinngorniarneq aamma Inunnik isumaginninnermut ilinniakkat tamarmik bachilorinngorniarfiusarput. Maanilu Ilulissani ilinniarfik Nuummi Ilisimatusarfimmi ilinniarfik assigiinngissuteqanngillat. Nuumi Ilisimatusarfittut maani Ilulissani ilinniartut ilisimatusartarput aamma ilinniartitsisut tamarluinnarmik kandidatitut ilinniagaqartuullutik, Andreas Ejlersen oqarpoq.
Ilulissani Perorsaanermik Ilinniarfiup, Ilinniartitaanermut Naalakkersuisoqarfik ukiut sisamat matumali attaveqarfigalugu oqaloqatigiissutigisarpaat, Isumaginninnermi siunnersortinngorniat Ilinniarfiata Nuummiittup Ilulissanut nuunneqarsinnaanera.
-Ukiut sisamat matuma siorna siunnersuutigigatsigu siunertaraarput, inunnik isumaginninnermut ilinniarfiit ataatsimoortinneqarnissaat, taamaasilluni ilinniakkat pitsaaanerulersinneqarsinnaammata.
Perorsaanermik Ilinniarfiup pisortarigallagaa, Andreas Ejlersen taama oqarpoq.
