Assi: Google Street view

Ilinniarfiit nuunneqarnissaannik suliat ingerlaqqissasut

Ilinniarfiit assigiinngitsut illoqarfinnut allanut Nuup avataaniittunut nuunneqarnissaat Naalakkersuisut anguniagarigaat naalakkersuisut siorna nalunaarutigaat. Ilinniarfiilli nuunneqartussatut siunnersuutigineqartut sisamaagaluarsinnarlutik manna marluinnanngorput.

Saviminilerinermik Ilinniarfiup Nuummit Sisimiunut nuunneqarsinnaanera, Niuernermik Ilinniarfiup Qaqortumut nuunneqarsinnaanera, Isumaginninnermilu siunnersortitut ilinniartitaanerup Ilulissanut nuunneqarsinnaanera, Eqqumiitsuliornermillu Ilinniarfiup Aasiannut nuunneqarsinnaanera eqqarsaatersuutigineqaraluarput.

Nuussiniarnerilli aningaasarsiornermut sulisussaqarniarnikkullu kingunerisassai, nuussiniarnernullu isumaqataanngitsorpassuit pissutaallutik Niuernermik Ilinniarfiup Isumaginninnermullu siunnersortitut ilinniarfiup nuunneqarnissaannut siunnersuutit Naalakkersuisut taamaatiinnarpaat.

AAMMA ATUARUK Naalakkersuisut vil først undersøge konsekvenser

Saviminilernermik Ilinniarfiup Sisimiunut, Eqqumiitsuliornermillu Ilinniarfiup Aasiannut nuunneqarnissaannut eqqarsaatit naalakkersuisunit suli attanneqarput. Naalakkersuisut nittartagaanni tamanna atuarneqarsinnaavoq.

Pingaartumik Eqqumiitsuliornermik Ilinniarfiup Aasiannut nuunneqarnissaanut pilersaarutit, siorna apriilimi siullermik saqqummiunneqartut, illuatungilerneqarput.

Eqqumiitsuliortummi peqatigiiffiata Kimik-up, Nuummilu Sisimiunilu kulturikkut illorsuit, Nunattalu Isiginnaartitsisarfiata, Isiginnaartitsisartunngorniarfillu pilersaarutinik isornartorsiuisunut ilaapput.

AAMMA ATUARUK Nuussuinissamik pilersaarut Naalakkersuisuni paatsiveerusimaarutigeqigaat

Ilinniartitaanermut Kultureqarnermullu naalakkersuisup Doris J. Jensenip ilinniarfiit nuunneqarnissaannut pilersaarutit nuannaarutigai:

- Naalakkersuisut ilinniartitaanermi nuunneqartussani ineriartortitsinissamut periarfissat takusinnaavaat. Uanga tunginniit piumasaqaataasimavoq nuussineq ilinniarfinnut iluaqusiisinnaassasoq, maannalu naliliisoqarsimalerpoq aningaasarsiornikkut aamma ilikkagassat tungaasigut ilinniakkanik pineqartunik nuussinissat iluaqutissartaqartut, Doris J. Jensen oqarpoq.

AAMMA ATUARUK Stadig uenigheder hos Naalakkersuisut

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl