Ilinniarfiit kollegiallu nutaat!

Nunatsinni ilinniagaqarfiit ineriartortinneqarlutillu allilerneqartussanngorput. Siorna sipaarniarnerujussuarmit eqqugaareerlutik, Namminersornerullutik Oqartussat periarfissaqalerput ukioq manna aningaasaliissutit amerlillugit 50 mio koruuninik ilinniagaqarnermut atugassiissuteqassallutik.

Danmark-imiit tapiissutinit 2005 –mut -06 –mut 07 –mullu 50 mio koruunit Inuussutissarsiornerup ilinniartitaanerullu ineriartortinnissaanut atorneqartussanngorlugit immikkoortinneqarsimapput. Siunertaasimavoq 25 mio koruunit Inuussutissar-

siornerup ineriartortinneqarnerinut atussasut affaallu 25 mio koruunit ilinniartitaanermut atorneqassasut.

Kisianni ukioq manna ilinniartitaanerup ineriartortinnissaanut sanaartugassanullu aningaasaliissutit 50 mio koruninut qaffanneqarsimasut Kultureqarnermut, Ilinniartitaanermullu Naalakkersuisoq Doris Jakobsen oqarpoq.

- Aningaasaliiffigivarput massakkut ilinniartitaaneq aallartittussaq tassaasoq inunnik ilinniartitaaneq aammalu peqqissutsimut ilinniartitaaneq. Taakku saniatigut aamma ilinniarfinnik allanik pilersitsinissaq pilersaarutaapput, Doris Jakobsen oqarpoq.

Taanna aperineqarpoq kollegiat amerlisarneqarnissaanut aamma aningaasat atorneqassanersut.

- Naluneqanngitsutut 2008-mi ilinniartut marloriaatinngortussaapput, taamaammat kollegianik amerlisaanissaq pingaarutilerujussuuvoq, minnerunngitsumik ilinnialersussanik amerlisaanissaq aamma taamatut. Tamakku pillugit 2008-mut piareersarluta aallartippugut, kollegiat amerlisillugit ilinniarfiit amerlisillugit aammalu ilinniartunik aningaasaliissutit qaffallugit, Doris Jakobsen oqarpoq.