Ilinniaqqusillutik ilungersortut

Ilinniarnissamut qinnuteqarnissamut killissarititaasoq sapaatip-akunnera qaangiuppat nalliutissaaq, ilinniarfiillu inuusuttunik qinnuteqaqqusillutik ilungersuleruttorput. Ilisimatusarfimmi qanoq pisoqarnersoq paasiniaavigaarput:

Ilinniarfiit ilinniartussaminnik kajumissaarutaat ulluni makkunani KNR-ikkut arajutsisassaanngillat. Inuusuttut Ilisimatusarfimmut qinnuteqarnissaannik kajumissaarut paatsuugassaanngilaq.

Qinnuteqartitsiniarlutik Ilisimatusarfik aqutsisunik, ilinniartitsisunik ilinniartunillu marlunnik inuttalinnik suleqatigiissitaliorsimavoq.

Ilisimatusarfimmi tullersortip Birgit Kleist Pedersen-p kajumissaarisunik pilersitsinissaq sooq pisariaqarnersoq oqaluttuaraa:

-Erseqqissarumavarput pitsassuarmik ilinniarfeqarfiusugut, nunarsuarmioqatitsinnut unammillerluarsinnaasoq. Ilinniarfitsinnimi nunani allani ilinniarneqarsinnaanngitsut neqeroorutigaavut. Nunatsinnut, Issittumullu tunngasut itisilerlugit ilinniarneqarsinnaapput, soorunalumi nunani allani ilinniarneqarsinnaasuttaaq neqeroorutigalutigik.

Ilinniartut ilinniartitsisullu qanilluinnarlutik suleqatigiipput, tamannalu immikkuullarissutigaarput, Ilisimatusarfimmi tullersorti Birgit Kleist Pedersen nassuiaavoq.

Ilisimatusarfimmut qinnuteqartartut ukiut kingulliit akuerineqartartut amerliartortuarput.