Ilinniaqqiffinni naammassisartut amerliartorput

Namminersulivinnerup anguniarneqarnerani Naalakkersuisut ukiuni arlalinni ilinniarlutik naammassisartut amerliartornissaat anguniartuarsimavaat, maannalu iluatsikkiartulerunarpoq. Nunatsinni ilinniarfinni amerlanerusuni naammassisartut amerliartorput, angusartagaallu aamma pitsanngoriartorlutik.

Nunatsinni ilinniaqqiffinnut radioaviisimit sianeqattaarnitsinni paasivarput ilinniarfeqarfinni amerlanerpaani naammassisartut amerliartortut angusaallu pitsaaneruleriartortut.

Ilinniarfissuarmi aasaq manna 33-it ilinniartitsisunngorput. Ataasiakkaat eqqaassanngikkaanni napparsimanertik peqqutigalugu naammassinngitsoortut, naammassisussat tamavimmik naammassisimapput. Ukioq atuarfiusoq nutaaq aallartippat ilinniartitsisunngorniat 80-it nutaat aallartissapput, aatsaallugooq taama amerlatigissallutik.

Ilinniarnertuunngorniarfinni tallimaasuni aamma siumuinnaq ingerlasoqarpoq. Misilitsittut tamavimmik ukioq manna nasartaarput oqaluttuarisaanermilu aatsaat taamak pisoqarluni. HTX-mi, HHX-mi GU-nilu pingasuusuni ilinniarnertuunngorniat 182-it tamarluinnarmik angusipput, ilinniarnerullu nalaani atuarunnartoqartaraluartoq, taamaattoq ilinniarnermut isiginnittariaaseq allanngorsimavoq.

-Inuusuttut ilinniarfitsik periarfissatut tigummisassatut isiginerulersimavaat, Nuummi Ilinniarnertuunngorniarfimmi pisortaq Margit Motzfeldt oqarpoq.

Aasianni ilinniarnertuunngorniarfimmeersoq Dorthie Siegstad oqarpoq inuusuttut angusaqarusunnerulersimasut ilikkarusussuseqarnerulersimasullu.

Perorsaanermik Ilinniarfimmi Ilulissaniittumi 27-it perorsaasunngorput. Ukiut marluk qaangiummata 27-it aallartipput maannalu tamarluinnarmik aamma naammassillutik.

-Inuusuttut tulluusimaarnaqaat, Henriette Frederiksen ilinniarfimmeersoq oqarpoq.

Sanaartornermut tunngasuni ilinniarfinni aamma naammassisoqaaluppoq.

Sisimiuni Sanaartornermik Ilinniarfimmi ukioq manna naammassisut ukiup siulianut sanilliullugu ikinnerulaarsimagaluartut, angusinngitsoornermik peqquteqanngitsoq Knud Næss Sanaartornermi ilinniarfimmi ilinniartitaanermi pisortaq oqarpoq.

-Naammassisartut marloriaammik amerlanerusarsinnaagaluarput, qinnuteqartorpassuit

praktikkerfissaqartartuuppata, Knud Næss oqarpoq.