Ilinnialerusuttut sullivinnik misiliiffissaqanngitsut

- Suliffinnik misileerusuttoqaqaaq, kisianni misiliiffissaqanngitsut amerlaqaat.
Assi © : KNR/Arkiv
oktobarip 01-at 2007 15:02

Nuummi Piaereersarfimmi pisortaq Morgens Schäfer, suliffeqarfinnut kajumissaavoq inuusuttunik ilinniarusuttunik sullivimminni misiliisitsisassasut. Taakkummatami siunissami ilinniartut naammassippata, sulisunik amigaateqarnermut ikilisaasussat.

- Suliffinnik misileerusuttoqaqaaq, kisianni misiliiffissaqanngitsut amerlaqaat. Tassani sanilliussagutsigit ilinnialersimasut kiisalu ilinnialersimanngitsut suliffimmik misiliiffissaqaratik. Soorlu Nuummiinaq inusuttut 100-it missaat suliffimmik misiliiffissaqarnatik ilinnialersimanngillat, Morgens Schäfer oqarpoq.

Suna pissutaava suliffimmik misiliisinnaanginnermut?

- Suliffeqarfiit ilai ilinniartoqarnissaminnut tunuarsimaartarput, kiisalu ilinniartoqarneq akissaajaatitut kiisalu suliaqusersuisutut isigisarlugit.

Suliffeqarfeqarporli ilinniartoqarnissaminnut ammasut misigisimasut ilinniartut ilinniakkaminnik naammassinissaanut akisussaaqataallutik, ileqqorlu ajunngilluartoq ileqquliussimallugit ilinniartoqarusuttartunik, Morgens Schäfer oqarpoq.

Sanaartornerup iluani siunissaq qanoq isikkoqarpa?

- Sanaartornerup iluani inuusuttut ilinniarnikkut assut amigaatigineqarput. Amigaatigineqartullu aamma allat amerlaqaat soorlu ruujurilerisut qalipaasut sanaartornerullu iluani allatigut ilinniagaqartut.

Nuummi sanaartugassaanaat eqqarsaatigissagaanni inuusuttunik ilinniagalinnik amigaateqartoqassooq annertuumik. Suliffeqarfiit amerlasuut ilinniartoqarnissaminnik soqutiginnipput, kisiat oqaatigiriikkatsitut aamma suliffeqarfiit amerlaqaat tunuarsimaartut, Morgens Schäfer naggasiivoq.

NUSUKA-p pisortaa Ole Aggu Markussen isumaqarpoq pisortat piumasaqaasiortalernerisigut ajornartorsiutip sukkanerusumik qaangeriartorneqarsinnaanera NUSUKAP pisortaata naatsorsuutigaa.