Ilinnialerusupput

oktobarip 14-at 2004 12:01

Ilinnialernissamut piareersarfiit massakkut kommunini arfinilinni misiligummik ingerlanneqartut, atuisuniit isumalluarfigineqarput.

Inuilimi ilinnialerusuttoq massakkut Qaqortumi piareersarfik Qisummi ilinniartut 18-iusut ilaat 22-nik ukiulik Hans Jørgen Kleist oqarpoq, Inuilimi iliniartunngornissaminut piareersarnini neriulluarfigalugu, ilungersussallunilu ilinnialernissamut allagartartaarnissamut . Qisummi atuakkerisarnerup saniatigut assassornermik suliassat assigingitsut aamma ingerlanneqartarput.

-Peqqussummi januaarip aallaqqaataani 2004-meersumi allassimavoq kommunini piareersarfiit siunnersuisarfiillu pilersinneqassasut. Tassani siunertaavoq siornatigut inuusuttut sulliviinisimasut ilinnialernissamut suliffeqalernissamullu aqqutissiuuneqarnissaat, inuussutissarsiornermik pisortaqarfimmi siunnersorti Jakobine Leander oqarpoq.

Kommuneqarfiit tamarmik piareersarfeqalerpata suliffissarsiorlutik ilinniagaqalerusullutilluunniit saaffiginnittut tamarmik qanoq pisariaqartitsinerat naapertorlugu siunnersorneqartassasut aamma pilersaarutaavoq.

Massakkut piareersarfiit misiligummik Nanortalimmi, Qaqortumi, Narsami, Paamiuni, Aasianni, Qasigiannguanilu ingerlanneqarput.

Piareersarfiit ingerlanneqarnissaanut inatsisartut nalunaarusiassaat massakkut Inuussutissarsiornermut pisortaqarfimmi suliarineqaleruttorpoq.