Ilinnialerniat siunnersorluarneqartalernissaat piumasarineqarpoq

Qaffasinnerusumik ilinniagaqartut tamaatiinnartarnerat pakkersimaarniarlugu killissarititaasunik 82-inik qiortartakkanik ingerlatsineq atorneqalissaaq.

Kalaallit Danmarkimi Ilinniagaqartut Kattuffianni ilaasortap Allan Olsenip taamatut aaqqissuussisoqarniarnera tapersersorpaa, oqarluni eqqarsarluaqqaarluni ilinniarfissamik qinersisoqarnissaa piumasaqaataalissagaluartoq.

Akerlianik Århusip Universitetiani naalagaaffiit pissusiinik ilinniartoq Allan Olsen isumaqarpoq ilinniarusuttunut siunnersuisarneq pitsanngorsartariaqartoq:

- Ilinniarniartunut piumasaqaatit taamaalinikkut sukannernerulerpata, taava ilinniarusullutik aalajangersimasut pitsaanerusumik siunnersorneqartalernissaat Namminersornerullutik Oqartussat tungaaninngaanniit pitsaanerulertariaqassaaq, Allan Olsen oqarpoq. Nangillunilu:

- Periuseq nutaaq atuutilerpat, ilinniartoq akisussaassusermik annertuumik tigummiaqalissaaq. Imaassinnaasoq ilinniarnerminik aallussinerulersoq, paarsilluarnerulerlunilu. Piumasaqaatilli annertusippata, siunnersuinerlu pitsanngoriassanngippat, taava isumaqarpunga tamanna akuersaarnanngilluinnartoq, Allan Olsen oqarpoq.

Allan Olsen Kalaallit Danmarkimi Ilinniagaqartut Kattuffiata siulersuisuinut ilaasortatut siorna qinigaavoq, ukioq manna ataatsimeersuaqqinnissap tungaanut ilaasortatut ingerlassalluni.

Kalaallit Danmarkimi qaffasinnerusumik ilinniagaqartut 650-t missaanniipput.