Ilinniakkat tuluttut ingerlanneqartut Danmarkimi ikilisarneqalersut

Danmarkimi ilinniakkani tuluttut ingerlanneqartuni inissat 1200-t angullugit Danmarkimi Ilinniartitaanermut Ilisimatusarnermullu minstereqarfiup atorunnaarsinniarpai. Taamatullu sukaterisoqalernera Nunatsinni tuluit oqaasiisa takornartat oqaasiisut siullertut inissinneqarnissaannik oqallinnermut pingaaruteqartoq, Folketingimi Inuit Ataqatigiit isumaqarput.

Inuusuttut ilinniagaqartut nunanit allaneersut ilinniakkamik naammassinerata kinguninngua Danmarkimit aallaannartartut akeqanngitsumik ilinniagaqartarnerinut ilinniagaqarnersiuteqartinnerinullu danskit naalagaaffiat aningaasanik atuivallaarpoq.

Danskit ilinniartitaanermut ilisimatusarnermullu ministeriat Tommy Ahlers (V) taama nalunaaruteqarpoq. Ministeqarfiummi misissuinerata takutippaa Danmarkimi tuluit oqaasii atorlugit ilinniagaqartut 42 procentiisa ilinniakkamik naammassinerata kingorna ukiut marluk qaangiukkaangata Danmark qimattaraat.

Taamaammat Ahlersip nalunaarutigaa Danmarkimi ilisimatusarfiit tuluit oqaasii atorlugit ilinniakkani inissat 1000-it 1200-llu akornanniittut 2019-imit atorunnaarsissagaat.

AAMMA ATUARUK Tuluit oqaasii nunatsinni takornartat oqaasiini salliutinneqassapput

Taamatullu aalajangertoqarnera kalaallinut savalimmiormiunullu Danmarkimi tuluit oqaasii atorlugit ilinniarusuttunut aamma sunniuteqassaaq, Ilinniartitaanermut Ilisimatusarnermullu ministereqarfik KNR-imut mailikkut ilisimatitsivoq.

- Suliniutigineqartoq ilinniakkani inissat ikilinissaannut tunngassuteqarmat, ilinniakkani tuluit oqaasii atorlugit ingerlanneqartuni inissat qinnuteqaateqarfigineqarsinnaasut ikinnerulernissaat naatsorsuutigineqartariaqarpoq. Taamaattumillu ilinniagaqartut kalaallit savalimmiormiullu, danskinut ilinniartunut naligiissinneqartut, immikkut ittumik pineqassanngillat.

Aaja: Atugassarititaasut ajornarnerulernissaat sungiuttariaqarparput

Ilinniagaqartut nunatsinneersut Savalimmiuneersullu - inuusuttunut nunanit allaneersunut naleqqiullutik - ilinniakkanik danskit oqaasii atorlugit ingerlataqarnissaminnut suli periarfissaqartut ministereqarfiup erseqqissaatigaa.

Folketingimut ilaasortaq Aaja Chemnitz Larsen naapertorlugu, Danmarkimi ilinniartitaanerup iluani sukaterisoqarnissaa nunatsinni politikerinit piareersimaffigineqartariaqarpoq.

AAMMA ATUARUK Qallunaat oqaasiisa tuluit oqaasiinik taarserneqarnissaannut siunnersuut eqqumiigineqarpoq

- Ilinniartitaanerup iluani sukaterinerit arlallit ukiuni kingullerni marlussunni pisimapput, danskimmi naalakkersuisui ilaatigut ilinniakkanik ingerlanneqarsinnaasunik kililiipput aamma ilinniagaqarnersiutinik ilinniakkanillu naammassisaqarnissamut sinaakkutissanik aaqqissuusseqqipput.

Kalaallit Danmarkimi akeqanngitsumik ilinniagaqarsinnaatitaallutillu Danmarkimi ilinniagaqarnersiutinik pissarsisinnaanerat immikkut pisinnaatitaaffiuvoq, Inuit Ataqatigiinneersoq erseqqissaavoq. Tamannalu illersorneqartariaqarsoraa.

AAMMA ATUARUK Tuluit oqaasii sallinngortinneqassappata naleqqussaasoqaqqaartariaqartoq

Tuluilli oqaasii nunatsinni allamiut oqaasiisut siullinngortinneqassappata tamatuma ingerlaannarsinnaanissaa Naalakkersuisut isumalluutiginaveersaassavaat.  

- Naalakkersuisummi ilinniartitaanernut piginnaasatigut nunatsinni siunissami pisariaqartitsinermut naapertuuttunut aningaasanik amerlanerusunik nassaarniartariaqarsinnaanertik eqqumaffigisariaqassavaat, Aaja Chemnitz Larsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat