Ilinniakkamut qinnuteqartut pilerngupput
Ilinniarfimmut nutaamut tassunga, ammerinermik kalaallisuulionermillu ilinniarfiusussamut, qanoq qinnuteqartoqarsinnaanersoq nalornissutigineqartarsimavoq.
Knud Rasmussenip Højskolianit ullumi nalunaarutigineqarpoq, qinnuteqarnissamut immersugassat illoqarfigisami Piareersarfimmit pineqarsinnaasut.
Ilinniartitaaneq nutaaq taanna inuussutissarsiutitaarniarluni ilinniartitaanermut assingusuusoq, ukiup ataatsip missaanik sivisussuseqassaaq. Ilinniarneq ukiuni marlussunni misiligutigalugu ingerlanneqassaaq, atisanillu ilusilersuisartunngorniarfimmik aallartitsinissamut, kalaallisuuliornermut ilinniarfik aallarniutaassaaq. Ilinniakkamut nutaamut qinnuteqartut qulit ilinniartunngornissaat naatsorsuutigineqarpoq, ilinniarnerallu sivikinnerpaamik ukiumik ataatsimik sivisunerpaamillu ukiunik marlunnik sivisussuseqassalluni.
