Ilinniagartuut Kalaallit Nunaanni suliumasut ikittuararsuupput
Inatsisilerituut aningaasaqarnermillu immikkut ilisimasallit kattuffianni, Djøfimi Kalaallit Nunaannut suliartorniartut pillugit akisussaasoq Birgitte Schneider ima oqarpoq:
- Inatsisilerituut aningaasaqarnerlu pillugu immikkut ilinniagartuut Kalaallit Nunaannukarnissaminnut soqutiginnittut maannakkut ikittuaraarsuupput. Ukiut pingajuata affaata matuma siornatigut kattuffimmi sulilerama Kalaallit Nunaannukarusuttut amerlanerugaluarput, Birgitte Schneider oqarpoq.
- Pissutsit taamaalernerannut Djøfimi ilaasortatta Danmarkimi piumaneqarluarnerat pissutaanerpaajugunarpoq.
- Aningaasarsiat saniatigut ineqarniarneq aningaasaqarniarnerlu oqaloqatigiissutigisarpavut, soorlu maannakkut Kalaallit Nunaanni aningaasat nalikilliartupiloornerat ilutigalugu ilaasortatta aningaasarsiaat qaffasigisassaanngillat.
- Paasissutissiissutitut tunniuttakkavut ilaasortatta allat Kalaallit Nunaanni misigisimasaannik aallaaveqarput, soorlu inissiat pitsaavallaannginneri, ilaatigullu iikkat matullu putoorsimasarnerat, kiisalu piffissami siullermi nuutsinneqaqattaartarneq oqaatigisarparput soorunalumi utaqqiisaasumik inissinneqarallaraanni akeqanngitsumik najugaqartoqartarmat tassuuna sipaarutaasinnaasut aamma ilangullugit eqqaasarpagut. Taava paasisatik naapertorlugit ilaasortavut namminneq aalajangissapput Kalaallit Nunaannukarusunnerlutik, Brigitte Schneider oqarpoq.
Kalaallit Nunaanni inatsisilerituunngorlaat, aningaasaqarnerlu pillugu ilinniagallit Danmarkimi atorfinittunut sanilliullutik aallaqqaammut qaammammut 2.000 koruunik anigaasarsiakinnerusarput, ukiulli soorlu arfineq pingasut atorfeqareersimasut aningaasarsiaat assigiiginnangajallutik.
