Ilinniagartuut ilinniartinneqarput

februaarip 23-at 2007 12:20

Ilinniagartuut nunanit assigiinngitsuneersut nunatsinnut tunngasunik ilisimatuussatut Pinngortitaleriffimmi ilinniartinneqarput. Ilisimatuut ilinniartinneqartut kingusinnerusukkut nunatsinnut iluaqutaalerumaartut, Pinngortitaleriffimmi ilisimatuutut atorfilik Søren Rysgaard oqarpoq:

- Nunani avannarlerni universitetit suleqatigalugit, ilisimatuunik 25-inik pikkorissaanerit siulliit, ukioq kingulleq Pinngortitaleriffimmi ingerlanneqarput. Ilinniartitavut ilinniagartuujoreerput, Pinngortitaleriffimmilu ilinniartitsinerup siunertaaraa nunatsinni avatangiisini pissutsinik ilisimasalittut, ilinniagartuut taakkua ilinniartillugit doktorinngortinnissaat. Ilinniagartuut taakkua nunatta iluaqutigillualersinnaavai, Søren Rysgaard oqarpoq, nangillunilu: Ilinniagartuut taakkua ilinniartissimasavut misilillugu nunatsinni sulisussatut aggersarniarsarisimavagut. Ilisimatuunik Norgemi ilinniartitseqqittarnerit iluatsilluarsimapput, tassami ilisimatuut Svalbard-imut suliartorlutik uteqqittarput, taamaasillunilu Norge pillugu ilisimasaqarluartut Norgemut suliartortalerput.

Søren Rysgaard aamma oqarpoq, ilisimatuut nunatsinnukarlutik ilinniaqqikkiartortarnerminni, avannaarsuani imaani pissutsit silaannarmilu pissutsit ilisimasaqarluarfigilertaraat.

- Sarfaq qanoq ingerlaarpa, imaani qanoq pisoqarpa, aalisakkallu sumiiffinni assigiinngitsuni qanoq amerlatigippat. Tassa avannaarsuani avatangiisini imaanilu pissutsit qanorpiaq ittuuneri qanorlu allanngorarsinnaaneri ilisimatuut ilinniartarpaat, Søren Rysgaard oqarpoq.

Taanna aamma oqarpoq ilisimasassarsioqatigiit Galathæa 3 angalaqatigisimallugit, tassanilu paasissutissat katersorneqarnerini paasineqarpoq, imaani uumasuaqqat bakteeriaasa akui, siunissaq eqqarsaatigalugu nappaatinut akiuussutissanik ineriartortsitsinermi atorneqarluarsinnaasut.

- Tassa ilisimatuut assigiinngitsorpassuit katersorsinnaagaanni paasisarpassuaqartoqarsinnaavoq, taamaammallu ilisimatuunik nunanit assigiinngitsuneersunik katersisarneq, assigiinnarpaa erlinnartuutinik katersineq, Pinngortitaleriffimmi ilisimatuutut atorfilik, Søren Rysgaard naggasiilluni oqarpoq.