Ilinniagartuut Demokraatinut saassussipput

Ilinniagartuut kattuffiata siulittaasuata Flemming Guntofte Nielsenip maanna Demokraatit avoqqaarilerpai. Taanna isumaqarpoq Demokraatit atorfilimmut atermik taasillutik saassussinerat pissusissamisuunngitsoq.

Taama iliorneq taassuma nuannaartorinnittussarsiornertut nalilerpaa.

Flemming Guntofte Nielsenip taama qisuariarnerminut peqqutigaa AG-mi ippassaq saqqummersumi Per Berthelsenip atorfittat qullersaata aqqa taallugu oqaaseqarsimanera. Per Berthelsen ilaatigut AG-mut ima oqarpoq:

- Atorfillillu ilassinnittarnermi aningaasaatinik atuivallaarsimanermik ajornarunnaarsitsisut akisussaatinneqalissasut isumaqarpunga, Per Bethelsen oqarpoq aterlu Namminersornerullutik Oqartussani atorfillit qullersaanni inissisimasoq ilanngullugu taallugu.

- Pinerlussimasoqartilluguluunniit inuit aqqi taaneqaqqusaanngillat, atorfillip saassussinerit taamaattut akisassarinngilai, oqaaseqaatillu taamaattut akineqartussaanatik. Demokraatit pinerluttoqarsimanerarlugu unnerluussiniarunik Politimesterimut saaffiginnissimassagaluarput AG-muunngitsoq, Flemming Guntofte Nielsen oqarpoq.