Ilinniagartuujunngikkaluartut pisortatut ilinniartinneqarsinnaapput

Ilinniagartuujunngikkaluartut suliffeqarfinni sulisuusut ilinniarteqqinneqartarnissaat periarfissatsialaasoq Katuami inuussutissarsiutit pillugit ataatsimeersuarnermi oqaatigineqartut ilagaat.
januaarip 28-at 2009 14:44

Ilinniartitseqqittarneq kalaallinut tulluartuuvoq, tassami nunaqavissut ilinniarluarsimasut amerlanngimmata. Taama oqarpoq danskit suliffeqarfiini pisortaasut ilaat, HTH-mi pisortaaneq, Henrik Karup Jørgensen, inuussutissarsiutit pillugit Katuami ataatsimeersuaqataasoq.

- Oqallissaarissaguma oqassaanga; suliffeqarfimmi pisortanngorniassagaanni sivisuumik atuagarsorluni ilinniarsimanissaq pisariaqanngitsoq. Oqaatigilluaannarlugu, sulisartut sulisitsisullu akunnerminni suleqataalluarnikkut anguniagaqarnikkullu angusaqarluarsinnaasut, naak atuarsimanerminnik uppernarsaammik takussutissaqartitsinngikkaluarlutik.

- Inuiaqatigiit ineriartoqqissagutta sulisartut patajaatsut inuussutissarsiornikkut anguniagaqarnitsinni atorluartariaqarpavut, Henrik Karup Jørgensen oqarpoq.

- Meeraallunga Paamiuni meeqqat atuarfianni atuarnikuugama, kingornalu marlussoriarlunga Kalaallit Nunaanniinnikuullunga, inuiaqatigiit qanoq aaqqissugaanerat ilisimasaqarfigilaarakku sulisut akornanni qanoq atuagarsornikkut ilinniagaqarsimasuunngikkaluarluni aqutseqataasoqarsinnaaneranik siunnersuuteqarusuppunga, Henrik Karup Jørgensen taama siunnersuuteqarpoq.

Ataatsimeersuarnerup nunatsinni inuussutissarsiornikkut iluaqutissartaa pillugu Henrik Karup Jørgensen oqarpoq, aqutsinerup suleqatigiinnerullu ataatsimeersuarnermi qitiutinneqarnerat pissanganartutut isigisimallugu suliffeqarfii annerit minnerillu akornanni suleqatigiinnerulernissaq aamma anguneqassasoq neriuutigalugu. Ataatsimeersuartoqarnerani inuit 250-it Katuami peqataapput.