Ilinniagartooq: Aningaasaqarnermut Ataatsimiititaliaq pinngitsaalineqarsimagunarpoq
- Eqqoriarpara ininnguamut isertillugit oqaaqqissaarneqarsimasut.
Naalakkersuinikkut tunngasunik naliliisartoq, Jakob Janussen taama naliliivoq.
Tassami maanna apeqqutigineqarsinnaalerpoq, ilaasortat taakku pingasut ilaasortaaffitsik Naalakkersuinermut tunngasunut taama pingaaruteqartigisoq, namminneerlutik qimanniarsimaneraat, naak taakku ilaasortat pingasut, Naaja Nathanielsen, Niels Thomsen aamma Aqqaluaq B. Egede oqaraluartut namminneerlutik ilaasortaajunnaarnissaminnik isummernertik tunngavigalugu taamaaliorsimallutik. Jakob Janussenili isumaqarpoq taamaattoqarsimagunanngitsoq.
- Pasitsaasimanarpoq ininnguamut isertillugit ataasiakkaarlugit oqarfigineqarsimassasut, Naalakkersuisooqatigiinneq ataannassappat, taama Naalakkesuisut isumaannik akerliusarneq killeqartariaqalersoq.
Janussen oqarpoq. Air Icelandimik isumaqatigiissusiorsimaneq aallaavigalugu, Inatsisartut Aningaasaqarnermut Ataatsimiititaliaasa ilaasortaat tamarmiullutik isumaqatigiissutigaat, Air Icelandimik isumaqatigiissutip atorunnaarsikkallarnissa siunnersuutigalugu, tamannalu Naalakkersuisunut apuullugu, isornartorsiuinermillu ilallugu.
- Oqareernittut, partii ataaseq amerlanerussutitaqarluni Naalakkersuisuutitaqanngimmat, Naalakkersuisullu ataannarsinnaassappata akunnerminni naaperiarfissaqartariaqarput, taamaalillutillu partiit ataasiakkaat qanoq atsigisumik imminnut nittarsaassinnaanerat killeqartariaqarluni. Qularinngilaralu ininnguamut isertillugit oqaaqqissaarneqagaatsiarsimassasut.
Jakob Janussen taama naliliivoq.
Naalakkersuisut siulittaasuata Kuupik Kleistip oqaatigaa, ajuusaarutigalugu ilaasortat tunuarnissaminnik aalajangersimanerat, nangillunilu oqarluni tamatumunnga pinngitsaalineqarsimanngitsut.
Kuupik Kleistip ilanngullugu aamma oqaatigaa, tunuartut tamarmik sulilluarsimasut isornartorsiuisarnerilu suliassaasa ilagiinnaraat.
Ataatsimiititaliani ilaasortanik allanngortiterinerni Naalakkersuisut siulittaasuat ataatsimeeqataasimani aamma oqaatigaa.
