Ilinniagartooq: Aalisartut ingerlaaqqatigiittut amerlagisassaanngillat

- Aamma imaassinnaavoq aalisartut aalajangersimasuinnaat kisimik naammagittaalliortut imalluunniit naammagittaalliutissaaleqisimagamik taama ikitsigalutik akerliussutsimik takutitsisut, Axel Jeremiassen oqarpoq.

Qaqortumi Ilulissanilu ippassaq akerliussutsimik takutitsisoqarnerani inuit 30-it ataallugit peqataapput.
- Aalisarneq Nunatsinni inuutissarsiutit pingaarnersaasoq eqqarsaatigissagaanni aammalu aalisartut akiluttortinneqartarnerat eqqarsaatigissagaanni akerliussutsimik takutitsisut amerlagisassaanngilluinnarput, Axel Jeremiassen oqarpoq.

Akerliussutsimik takutitsisut taama ikitsiginerisa KNAPK-p qullersaqarfiata sanngiillisimaneranut ersiutaalluarsinnaasoq Axel Jeremiassenip aamma nalilerpaa:

- Imaassinnaavoq tassuuna sanngiilliortut. Soorluuna qitiusumik qullersaqarfik kisimi sullissinerusoq. Immikkoortortaqarfiillu peqataatinneqarneri aamma amigartoq. Aammali immaassinnaavorlu qullersaqarfimmi siulersuisut tusiapittumik ingerlasut.

Kikkummiuku taava akerliussutsimik takutitsinissaminnut kajuminnerusimasut, Axel Jeremiassen aperaarput, taannalu ima akivoq:

- Imaassinnaavoq maanna partiinut Naalakkersuisooqatigiinnut taasisimanngitsut nipituuliortut akerliussutsimik takutitseqataasut aammali imaassinnaalluni illuatungiliuttut isummersortaasiannut qanittumik isummersortartut sukataarnerusut. Taama naliliivoq inuiaqatigiilerinermik ilisimasalik, Axel Jeremiassen.