Ilinniagariniakkamik toqqaanerluttarneq unissutaanerpaasarpoq
Ilinniarfiit assigiingitsut 25-it kikkunnut tamanut ammasumik ilinniarfimmik nittarsaasereerlutik, ataasinngornermi ilinniarnertuungorniarfinni HHX-mi GU-milu ilinniartunut Qaqortumi paasititsiniaapput.
-Danmarkimi kunstakademi-mi ilinniarnissara aalajangiuppara, soorunami pissutsit Kalaallit Nunaanniit allarujussuunerat piareersimaffiginiassavara, ajornartorsiulissagumalu ingerlaniaanartariaqarpunga, Kujataani ilinniarnertuungorniarfimmi 3.GU-mi atuartut ilaat, Karl Inuk Faurschou oqarpoq.
Jylland-imi nipilersornermut ilinniarfimmi ilinniartunngortussaq, Ejner Nielsen isumaqataavoq.
-Arlaanik ajornartorsiummik takkuttoqarpat anigorniartariaqassavara, oqarpoq.
Aalborgimi Kalaallit illuani kalaallinut ilinniartunut siunnersorti Jonathan Johnsen-ip Danmarkimi ilinniagaqalertussanut kaammattuutigaa pissutsit allaanerunerat piareersimaffigineqassasoq.
-Assersuutigalugu ilinniartut najugaqarfiini najugaqassanngikkaani inissarsiorneq noqqaassutigereertariaqarpoq, Jonathan Johnsen oqarpoq.