Ilinniagaqarumasunut najugaqarfiit amigaataapput
Nunatsinni ilinnigaqarumasunut najugaqarfiit, kollegiat, amigaataapput. Eqqugaasut ilarpassui tassapput inuusuttut nunaqarfimmiorpassuit, ilinniartoqarfiit ”Piareersarfinnik” taaguuteqalersut aqqutigalugit illoqarfinni ilinniagaqarumalersimasut.
Uummannap kommuniinnaa eqqarsaatigalugu inuusuttut 15-iniit 25-t tikillugit ukiullit katillutik 35-t aggustusimi aallartittussanngorsimapput, taakkunannga nunaqarfinneersut 23-ullutik.
-Taakkunannga arfineq-marluk inissaqartinngilavut, taama oqarpoq Bent Rosing, Uummannami Piareersarfiup pisortaa.
Kommune suleqatigalugu BSU-p illuutai, Namminersornerullutik Oqartussaninngaanniit kommuni ikiortigalugu qinnutigniarpagut illut marluk, massakkuugallartoq.
Boligstøtte aqqutigalugu illuliat marluk pineqartut iluarsaanneqaraluarpataluunniit ajornartorsiummik qaangiisoqarnavianngilaq, tassani illut taakku pineqartut Piareersarfimmi ukiumi siullermi ilinnialersunuinnaq najugaqarfigineqarsinnaammata.
-Ukiup appassaanik Piareersarfimmi ilinniartuulersut namminneq illoqarfimmi najugassarsiortariaqarput, Bent Rosing nassuiaavoq.
Borgmester Jens Lars Fleischer oqarpoq, Inuussutissarsiornermi Ilinniartitaaneq kommuninut januaarip aallaqqaataani akisussaaffigineqaleraluartoq, taamaattoq kollegialiortiternerup uninnani ineriartornermut malinnaatinneqarnissaa Namminersornerullutik Oqartussat akisussaaffigigaat.
-Nuna tamakkerlugu politikerit inuussuttut ilinniaqqeqqullugit inaattuarpaat, kisianni kollegialiornerit malinnaatinneqanngippata, amerlasuut ilinniaqqinnissaminnut kajumikkunnaassapput, Uummannap Kommuneani borgmester Jens Lars Fleischer oqarpoq. Aamma ilisimatitsissutigaa marsilli qaammataani Naalakkersuisunut Uummannami kommunalbestyrelsi allagaqarsimasoq, ajornartorsiut pineqartoq pillugu, sulili allakkatigut akissuteqartoqasimanngitsoq.
Inuussutissarsiutinut ilinniartitaanermut Pisortaqarfimmi siunnersorti Ulla Broberg oqarpoq, 20 mio. koruunit Piareersarfimmi ilinniartunuinnaq inissialiassanut 2007-imi atugassatut Aningaasaqarnermut Inatsimmi siunnersuutigineqarsimasut, ukioq mannali aningaasanik immikkoortitsisoqarsimanngitsoq.
