Ilinniagaqartut pingasut nunani allani ilinniarnissaminnut tapiiffigineqartut

Ilinniagaqartut nunatsinneersut pingasut nunani allani ilinniarnissaminnut aningaasaateqarfimmit Ivalo & Minik Fondenimit aningasaatigut tapiiffigineqartussanngorput.
Ivalo & Minik Assi © : Brian Mølgaard/KNR
apriilip 07-at 2017 08:00
Nutserisoq Simon Uldum -

Aningaasaateqarfiup siulersuisui tusagassiorfinnut nalunaaruteqarlutik taama ilisimatitsipput.

Aningaasaateqarfik ukiup matuma affaani siullermi legatinik agguaasseqqaarnermini nunani allani ilinniartussanut pingasunut legatinik katillugit 280.000 koruuninik aningaasartalinnik agguaassivoq.

Legatinnattut tassaapput Martin Christiansen, Romimi Jon Cabot Universitymi semesterini marlunni ilinniartussaq.

Sara Biilmann Egede nittarsaassineq atuisullu pissusilersuutaat sammillugit New Zealandimi University of Otagomi ilinniarnissaminut tapiiffigineqarpoq.

Kingullertullu, minnerunngitsumillu, Bettina Søgaard diplomingeniørinngorniarnerminut atatillugu Malaysiami Swinburne University of Technologymi semesterimi ataatsimi ilinniarnissaminut legatinnappoq.

Aningaasaateqarfimmi Ivalo & Minik Fondenimi siulittaasoq, Minik Rosing, naapertorlugu legatinik agguaassisoqarnera ilinniarsimasut Nunatsinnut uternissaannut siunissami aqqutissiuissaaq.

- Legatinnattut piginnaasarpassuarnik inuiaqatigiit ineriartorteqqinnissaannut atorneqarsinnaasunik nassarlutik Nunatsinnut uternissaat neriuutigaarput, siulittaasoq tusagassiorfinnut nalunaarummi taama oqarpoq.

Legatit Royal Arctic Line A/S-imit, Royal Greenland A/S-imit, GrønlandsBANKEN-ip Inuussutissarsiornermut aningaasaateqarfianit NunaFondenimiillu tunissutaasut tunngavigalugit aningaasalersugaapput.