Ilinniagaqarneq, ilinniagaqarneq, ilinniagaqarneq

Ilinniagaqarneq qanoq ililluni naleqqussarneqarsinnaava, aamma ullutsinnut? Nunap inoqqaavisa atuarfiini taanna apeqqutaavoq annertooq. Ilinniagaqarneq Canadami nunap inoqqaavisa akornanni ajornartorsiuterujussuuvoq, unammillernaqalunilu.

Canadami ilinniartitsisut kattuffiat Ottawami sapaatip-akunnerani uani ataatsimeersuarpoq, unammillernartut tamakku oqaluuseralugit. Ilinniartitsisut millionit sisamararterutaat kattuffimmut ilaasortaapput.

Naggueqatigiit Inuit, indianerit metisillu 150-it ukiumoortum,ik ataatsimeersuarnermi peqataapput, isummatillu saqqummiullugit.

Mary Simon, naggueqatigiit Inuit pisortaat, ilisarisimaneqarluartoq, naggueqatigiit Inuit ilinniagaqarnissaannut nuna tamakkerlugu maanna siulittaasuusoq, ukiumoortumik ataatsimeersuarnermi nassuiaavoq, naggueqatigiit Inuit ilinniagaqarnissaasa qanoq pingaaruteqartiginera nassuiaatigalugu, tamannalu suli pitsanngorsarniarlugu Canada tamakkerlugu tapersersortissarsiortoqarnerarlugu.

Mary Simon Radioaviisimut oqarpoq, naggueqatigiit Inuit ilinniagaqarnissaat pitsanngorsarniarlugu angajoqqaat akuutinneqarnissaat pingaaruteqarnerpaanut ilaasoq.

Meeqqat ukiut atuarfiusut angerlarsimaffimminnit ikiorneqarnatik amerlanertigut qaangerniarsarisarpaat, tamannalu iluatsittuaannanngilaq.

Meeqqat inersimasunngornerminni ilinniagaqarnissaanni angajoqqqaat soqutiginnilersinnissaat akuunerunissaallu naggueqatigiit Inuit ataatsimiititaliaata paasititsiniaaneranni anguniagaavoq.

- Tamanna kikkunnut tamanut unammillernartorujussuuvoq, Mary Simon oqarpoq.