Ilinniagalik: Nunatsinnut uternissaq pingaaruteqarpoq
Nittarsaassinermi takussutisiisut ilagaat, inatsisilerituutut ilinniarnerminik naammassinneqqammersoq Katinka Boysen-Kleist, ukiut arfineq- pingasut ilinniareerluni Kalaallit Nunaannut uternermini misigisai. Katinka Boysen-Kleist nittarsaassinermi saqqumiivoq.
- Tassa imaannaanngilaarnikuuvoq, kisiat aamma nuannertorujussuulluni. Danmarkimi ukiut arfineq-pingasut najugaqarnikuulluni qallunaanngornalaarami. Kisianni qaammatit sisamassaat maannakkut Nuummi najugaqarpugut. Meeraallungalu nalunnginnikuuara Danmarkimut iliniariartussallunga, aamma uternissara qamaniitittuaannarnikuuara, iliniarnikut Kalaallit Nunaanni amigaataammata. Taamaattumik pingaartippara ilinniartut aamma eqqarsaatigissagaat arlaatigut Kalaallit Nunaannut utissasut sullisseqataallutillu. Inatsisilerituutut ilinniarnerminik naammassereerluni Nunatsinnut utertoq Katinka Boysen-Kleist taamatut oqarpoq.
Nunatta Eqqartuussiviani eqqartuussisoq Myrna Lynge Københavnimi suliffiit nittarsaanneqarneranni inatsisilerituutut iliniarsimasunik sulisussarsiornermi peqataavoq.
Nunatta Eqqartuussivia inatsisilerituutut ilinniarsimasunik kalaallinik sulisoqanngilaq.
- Soorunami neriuutigaarput inatsisilerinermik ilinniartunik siqutiginnilersitsisinnaassalluta, Myrna Lynge oqarpoq.
Aningaasaqarnermut naalakkersuisoq Palle Christiansen Kalaallit Nunaanni suliffeqarfiit Københavnimi nittarsaanneqarneranni peqataavoq.
Namminersorlutik Oqartussani nutaanik atorfinitsisarneq uninngatinneqarpoq, atorfeqarnermut atatillugu inissiat tamarmik atorneqarmata, Palle Christiansen oqarpoq.
Suliffinnut atatillugu inissiat maannakkut Dronning Ingridip Napparsimavissuarmi sulisunut inissiat sanaartorlugit naammassineqarput, atorneqalerlutillu, neriuutigaalu aappaagu ukiup ingerlanerani Nuummi Qinngorpumi sulisunut inissiat naammassineqarumaartut, atorneqalerlutillu.
Københavnini suliffeqarfiit nittarsaanneqarneranni Namminersorlutik Oqartusssat sulisuminut inissaqartitsitsinani atorfinitsitseqqusiunnaartoqarlu tamanna atorfinititsinissamut pilerisaarisoqarnerani ajornakusoortuunersoq, Palle Christiansen aperineqarami, oqarpoq, suliffeqarfiit kommuunillu nittarsaassimmata taakkunanilu atorfinititseqqusiunnaarneq atuutinngimmat neriuutigalugu taakkunani sulilernissaminnut saaffiginnittoqarumaartoq qinnuteqartoqarlunilu, Palle Christiansen oqarpoq.
- Namminersorlutik Oqartussat suliffeqarfiutaani sulisunut inissat ajornartorsiutaapput, naak ilinniakkaminnik naammassinnittut Kalaallit Nunaannut uternissaat kissaatigigaluaqigipput, erseqqissaatigissavarpulu atorfiniinnermut atatillugu sulisunut inissianik Nuummi maannakkut sanaartortoqarmat, Palle Christiansen oqarpoq.
- Namminersorlutik Oqartussat suliffeqarfiini pinngitsoorneqarsinnaanngitsunik atorfinnut qinnuteqartoqarpat taakkua atorfinitsissavagut inissaannillu tunillugit, soorlu nakorsamik aforfininniarluni qinnuteqartoqarpat, taanna atorfinitsissavarput inissaanillu tunillugu, aningaasaqarnermut Naalakkersuisoq Palle Christiansen oqarpoq.
