Ilimmarfik pisortatigoortumik atoqqaartippaat
Ilisimatusarfimmi pisortaq Estrid Janusseni tikilluaqqusereermat Nordisk Koncertkorikkut erinarsorput. Kingorna arlallit oqalugiarput, aamma Kultureqarnermut, Ilinniartitaanermut Ilisimatusarnermut Ilageeqarnermullu naalakkersuisoq Tommy Marø.
- Isumalluarfigeqaarput, aamma neriuppunna nunatsinni manna Ilisimatusarfik aqqutigalugu nunatta namminiileriartorneranut ilinniartitaanerit pitsaassusianik qaffassaanermi inuusuttortagut akuulluarumaartut. Illorsuarmik pitsaasorsuarmik tunineqarput taannalu atorluartariaqarpaat.
Tommy Marø taama oqarpoq. Ilisimatusarfik nalinginnaasumik 140-t missaannik ilinniartoqartoq illorsuartaamut nuunnermi 400-t missaannik ilinniartoqalerpoq, soorlu tusagassiortunngorniat aamma inunnik isumaginninnermik siunnersortinngorniat. Oqaasileriffik, atuagaateqarfik Groenlandica naatsorsueqqissaartarfillu aamma illorsuarmi nassaassaalerput.
Rektorertaaq upperisarsiornermi doktori Aage Rydstrøm-Poulsen Ilimmarfissarsuup siunissaanut isumallualereerpoq:
- Ilumut, persuarsiornarporloorniit, Kalaallit Nunaammi ukiuni 20-ni ilisimatusarfeqareerluni illorsuarmi ilisimatusarfittaarpoq ilinniarfippalaavissumut.
Nunarsuarmi allami universitetinut nallersuussinnaallualerpugut, Rektori Aage Rydstrøm-Poulsen oqarpoq.
Atoqqaarfissiortitsinermi aamma oqalugiartuupput oqaasileriffimmi pisortaq Carl Chr. Olsen aamma Alaskami ilisimatusarfissuarmik aallartitsisuusimasoq ilisimatooq Frank Damell. Taamatuttaaq inuiaqatigiilerinermik ilisimatooq Canadami Ottawami ilisimatuutut sulisoq Karla Jessen Williamson atuffassivoq.