Ilimmarfik nappaanersiorneqarpoq
Sanasut, politikerit, atorfillit, ilisimatusarfimmeersullu
Namminersornerullutik Oqartussat pilersitaata ilisimatusarfissarsuup Ilimmarfiup ullumi nappaanersiorneqarnerani pølsenik aappaluttunik, sodavandinik, iffianillu qallersukkanik sassaallerfigineqarput.
Kultureqarnermi ilinniartitaanermi ilisimatusarnermilu naalakkersuisoq Doris Jakobsen ima ilaatigut oqalugiarpoq.
- Qimmeqarpugut illerngit takusinnaavagut nalunngilarput sumukarniarnerluta taamaattumik qamusiorniarta aallajaarniassaagut, inuusuttut upernaallu qalipaataat atorlugit.
Doris Jakobsen oqalugiareermat aperaarput Ilimmarfiup nappaanersiorneqarnera qanoq misinnartinneraa.
- Nuannersorujussuuvoq aamma isumaqarpung alloriarneq annertuujusoq, qularinngilara kusanartorujussuarmik naammassissasoq allanut aamma takujuminartunngorluni. Taamaammat ilinniartunut ilinniartitsisunullu inuiaqatigiinnullumi iluaqutaassasoq qularnanngilaq. Isumaqarpunga ilinniartut ilinniartitsisullu imminnut qaninnerulissasut. Aammalu suleqatigiinneq annertunerusoq pilersinneqartussaavoq, Doris Jakobsen oqarpoq.
- Nunatta namminersuleriartuaarnerani pisartut immikkut malunnartinniartariaqartut ilagaat nalerassatsinnik nappaasarnerput. Ilimmarfiup illutassaata namminersuleriartuaarnitsinnut naleqqamik nappaaneruvoq, sanaartornermut naalakkersuisoq Jørgen Wæver Johansen oqalugiaammini taama ilaatigut oqarpoq.
Ammaanersiornermi sanasut ilinniartut nukarlersaata kransit pingasut ammut alliartortut qilaamut portoqisumut nivinngarpai. Ilimmarfiup sananeqarnerani sanasut katillugit 70-t missaanniipput.
Elektrikerillu ittuat Oluf Josefsen aperaarput illuliat annersaanni sanaqataanini qanoq oqaatigisinnaaneraa.
- Suliarinera nuannersimaqaaq sanaartukkanut allanut naleqqiullugu allaanerulaarnermik taannartaa pissanganartorigamiuk, oqarpoq.
- Ilisimatusarfik siuariarujussuarpoq allamik oqarsinnaanngilanga ullumikkut assorsuaq
Nuannaarpunga, Ole Marquardt taama oqarpoq. Ilimmarfimmi ilisimatusarneq siulleq 2008-mi aggustimi pissaaq, taamanikkussamullu issittup ilisimatusarfigineqarnera pillugu ataatsimeersuartoqassaaq. Ataatsimeersuarnermi inuit 400-t missaanni amerlassusillit peqataassasut oqaatigineqarpoq.
