Ilimmarfik issittup ukioqarnerani atoqqaarfissiorneqassaaq

Issittumut nunarsuaq tamakkerlugu Ukioritinneqartut Københavnimi Illu Atlantikumi assorsuaq aallartilluarput, naak Qalasersuarmiit satellitsi aqqutigalugu Frankrigimut toqqaannartumik aallakaatitsinissaraluaq teknikkikkut ajornartorsiuteqarneq pissutigalugu taamaatiinnartariaqarsimagaluartut, Sermitsiaq nittartakkamini allappoq.

Ilimmarfiup Issittup Ukiuisa atuunnerini ammaanersiorneqarnissaa Naalakkersuisunut ilaasortap, Tommy Marøp, oqalugiarnermini nuannaarutiginerarpaa.

Ilisimatusartut nunarsuarmit tamaneersut Ilimmarfik iluaqutigissaqigaat Marøp qularutiginnginnerarpaa, iluaqutillu Kalaallit Nunaannut aamma sunniuteqanngitsoornaviannginnerarlugit.

Avatangiisinut Danmarkimi ministerip, Connie Hedegaardip, Issittup Ukiuinut atatillugu danskit kalaallillu ataatsimiititaliaat nersualaarpai, ilisimatusarnissat inuit atugaannut aamma tunngassuteqarmata.

– Knud Rasmussenip anersaavalusooq ersersinneqarpoq, Connie Hedegaard oqarpoq. Ilisimatusartut sulilluarnissaannik Connie Hedegaardip kissaappai, erseqqissaatigalugulu nunarsuaq tamakkerlugu issittumik ilisimatusarneq, IPY-mik taaguuserneqarsimasoq, issittoq pillugu ilisimatusartut inuusunnerit aamma atorluassagaat.